კანადელმა მწერალმა და ბესტსელერის ავტორმა მარგარეტ ეტვუდმა მხევლის წიგნის გაგრძელება დააანონსა. წიგნის სახელი The Testaments [აღსარებები] იქნება და ის 2019 წლის 10 სექტემბერს გამოვა.

"ძვირფასო მკითხველო, ყველაფერი, რაც თქვენ გილიედის შესახებ მკითხეთ, ამ წიგნის შთაგონება იყო. უფრო სწორად, თითქმის ყველაფერი! შთაგონების სხვა წყარო ის სამყარო იყო, რომელშიც ახლა ვცხოვრობთ", - წერია ეტვუდის მიერ გავრცელებულ პრესრელიზში.

მხევლის წიგნი 1985 წელს გამოვიდა. ისტორია ამერიკის ტირანულ მომავალში ვითარდება და მასში მოთხრობილია ერთი ქალის ბრძოლა გადარჩენისთვის. ადგილს გილიედი ჰქვია და იქ ქალთა უფლებები შეზღუდულია.

წიგნმა პოპულარობა სექსუალური შევიწროებისა და აბორტის უფლების პრობლემის საერთაშორისო განხილვასთან ერთად ხელმეორედ მოიპოვა. ბოლო წლების განმავლობაში, ინგლისში მხევლის წიგნის 8 მილიონი ასლი გაიყიდა.

2017 წელს გამოვიდა Hulu-ს მიერ წიგნის მიხედვით გადაღებული სერიალიც, რომელშიც მთავარ როლს ელიზაბეტ მოსი ასრულებდა. სერიალმა 6 ემი და 2 ოქროს გლობუსი მიიღო. 2018 წლის აპრილში გამოვიდა სერიალის მეორე სეზონიც.

ეტვუდის მიხედვით, წიგნს სერიალის ნარატივისგან დამოუკიდებელი ხაზი ექნება.