ჩინეთში სახის ამომცნობ კამერებს ნებისმიერი კრიმინალის ამოსაცნობად იყენებენ. მნიშვნელობა არ აქვს, ბანკის მძარცველს ეხება საქმე თუ უბრალოდ ქუჩის უკანონოდ გადამკვეთს, სისტემა თითოეულ მათგანს სცნობს. გასულ კვირას, ერთ-ერთი ასეთმა "ჭკვიანმა" კამერამ ცნობილი ბიზნესმენი ქალბატონი საჯაროდ შეარცხვინა წითელ მაშუქზე უკანონოდ გავლისთვის. იკითხავთ ალბათ, თუ კანონი დაარღვია, რატომ გახდა ეს საკითხი სალაპარაკოო, მაგრამ საქმე ისაა, რომ ქალბატონი ფიზიკურად იმ ადგილას არც კი ყოფილა.

როგორც უცხოური მედია იტყობინება, შემთხვევა Zhejiang-ის პროვინციაში, შანხაის სამხრეთ ნაწილში მოხდა. დაჯარიმებული აღმოჩნდა დონგ მინგჟუ, წარმატებული კომპანიის პრეზიდენტი, რომლის სახეც დიდ ეკრანზე გამოჩნდა იმ ადამიანების გვერდით, ვინც უახლეს წარსულში იგივე კანონი დაარღვია. ეკრანზე გამოსახული იყო მისი ფოტო, სახელი და გვარი და პირადი ნომრის ნაწილი. აღმოჩნდა, რომ პროგრამამ "კანონ დამრღვევის" გვარიც არასწორად ამოიცნო და Mingzhu-ს ნაცვლად Mingju გამოიტანა.

ფოტო: Weibo

სინამდვილეში კი, ის რაც კამერამ დაინახა, ავტობუსზე გამოკრული რეკლამა იყო, რომელზეც მილიონერი ქალბატონის სახე იყო გამოსახული. ადგილობრივმა პოლიციამ მალევე აღნიშნა, რომ კამერა შეცდა, როდესაც დონგი უკანონობაში დაადანაშაულა. მათი მტკიცებით, პრობლემა უკვე მოგვარდა და სისტემაც გამართულად მუშაობს.

დონგ მინგჟუ ცნობილი ჩინელი ბიზნესმენია, რომელიც ფორბსის სიაში 100 გასაოცარი ბიზნესვუმენის სიაშიც კი შედის. დონგი ხშირად აცხადებს, რომ 26 წლის განმავლობაში ერთი დასვენების დღეც არ გამოუყენებია და ყოველდღიურად მუშაობს.

ეს შემთხვევა კი, ინტერნეტში დიდი განხილვისა და კრიტიკის საგანი გახდა. ჩინეთის მთავრობაში ამ კამერებით დიდი ხანია ამაყობენ და ამბობენ, რომ მისი დაყენების შემდეგ უამარავი დამნაშავე დააკავეს, თუმცა როგორც ჩანს, ის ბოლომდე გამართულად მაინც არ მუშაობს.