ცენტრალური საარჩევნო კომისია ერთიანი ნაციონალური მოძრაობის ბრალდებას სამგორის საარჩევნო ოლქის სპეცსიებში ამომრჩევლების ხელოვნურ გაზრდასთან დაკავშირებით უარყოფს.

ცესკოს პრესსპიკერის, ანა მიქელაძის თქმით, მონაცემებს იმ პირების შესახებ, რომლებიც არჩევნების დღეს საკუთარი სამსახურებრივი მდგომარეობის გამო იმყოფებიან რეგისტრაციის ადგილისგან განსხვავებულ მისამართზე, ადგენს და საარჩევნო ადმინისტრაციას გადმოსცემენ შესაბამისი უწყებები.

"ძირითად სიაში ანუ იქ, სადაც იმყოფებიან ეს პირები და არიან რეგისტრირებულები, კეთდება სპეციალური ჩანაწერი, სადაც არის მითითებული, რომ აღნიშნული პირები არიან გადაყვანილი სპეციალურ სიაში, რაც იმას უზრუნველყოფს, რომ თითოეული მოქალაქე არჩევნებში იღებს მონაწილეობას მხოლოდ ერთხელ", — აღნიშნა მიქელაძემ.

დღეს, 24 ნოემბერს ენმ-ს პოლიტსაბჭოს წევრმა, ლევან ბეჟაშვილმა განაცხადა, რომ ცესკომ სამგორში სპეციალურ სიებში ამომრჩევლების რაოდენობა ხელოვნურად გაზარდა. მისივე თქმით, ეს პირველ ტურში გრიგოლ ვაშაძემ სალომე ზურაბიშვილი სამგორში დაამარცხა.

ბეჟაშვილის განმარტებით, საპრეზიდენტო არჩევნების მეორე ტურისთვის სამგორის საარჩევნო ოლქის სპეცსიაში 1 329 პოლიციელი და სამხედრო მოსამსახურეა რეგისტრირებული.