უკრაინულ საიტზე zdes.com.ua აუდიო ჩანაწერი "სააკაშვილის ახალი რევოლუცია" გავრცელდა, სადაც, სავარაუდოდ, საქართველოს ყოფილი პრეზიდენტის, მიხეილ სააკაშვილისა და ძალა ერთობაშიას საარჩევნო შტაბის ხელმძღვანელის, გიორგი ვაშაძის საუბარი ისმის.

დაუდგენელია, ავთენტურია თუ არა გავრცელებული აუდიოჩანაწერი და დამონტაჟებულია თუ არა მოსაუბრეების ხმები. ჩანაწერში, სავარაუდოდ, მიხეილ სააკაშვილი, მეორე პირს, სავარაუდოდ, გიორგი ვაშაძეს ეუბნება, რომ მათ რევოლუციური განწყობა არ აქვთ. მოსაუბრეები უხამსი სიტყვებით მოიხსენიებენ მოქმედ საპრეზიდენტო კანდიდატს, გრიგოლ ვაშაძეს.

გიორგი ვაშაძე რუსთავი 2-ზე, გადაცემა არჩევანში გამოეხმაურა გავრცელებულ ჩანაწერს და "ღიმილისმომგვრელი" უწოდა.

"ჩემი ხმა ვერ ამოვიცანი საერთოდ, ტერმინოლოგია აბსოლუტურად სხვადასხვაა. ერთი რამ შემიძლია ვთქვა, რომ ძალიან ცუდად აქვთ საქმე, ასეთი თაღლითობების იმედი რომ აქვთ", — ამბობს გიორგი ვაშაძე.

იმავე გადაცემაში, ევროპული დემოკრატების თავმჯდომარემ, პაატა დავითაიამ თქვა, რომ ჩანაწერს, როგორც ყოფილი გამომძიებელი და პროკურორი, ისე აფასებს. მისი ვარაუდით, ჩანაწერი დაჭრილი სიტყვათა წყობითაა აწყობილი.

"არ შეიძლება იყოს ცალ-ცალკე ფრაზები აღებული. ღიად ჩანს, ამას ექსპერტიზაც არ სჭირდება. ასე საუბარი არ ხდება, არ ხდება თემებზე გადახტომა, რევოლუციიდან ისრაელზე", — განმარტავს პაატა დავითაია.

იმავე ვებგვერდზე ოქტომბერშიც გავრცელდა აუდიოჩანაწერი, სადაც, სავარაუდოდ, ექს-პრეზიდენტი მიხეილ სააკაშვილი თავის ბიძას, თემურ ალასანიას ესაუბრება.