შინაგან საქმეთა სამინისტრომ ხელვაჩაურში მომხდარ ავარიაში მონაწილე მძღოლი ტრანსპორტის უსაფრთხოების წესის დარღვევის ბრალდებით დააკავა. უწყების ცნობით, ავარიის შედეგად ერთი პირი გარდაიცვალა, ერთი კი დაშავდა.

გამოძიების ვერსიით, ბრალდებული 18 ნოემბერს, ღამით ხელვაჩაურში, ჭარნალი-ახალსოფლის გზაზე ავტომანქანით მოძრაობდა, როცა ქვეითად მოსიარულეებს შეეჯახა და მიიმალა. ერთი მათგანი ადგილზე გარდაიცვალა, მეორე კი საავადმყოფოში გადაიყვანეს. უწყების ინფორმაციით, ნივთმტკიცების სახით ავარიაში მონაწილე ავტომობილი ამოიღეს, რომელიც დაკავებულმა კვალის დაფარვის მიზნით ნაწილებად დაშალა.

საქმეზე გამოძიება საქართველოს სისხლის სამართლის კოდექსის 276-ე მუხლის მეხუთე ნაწილით მიმდინარეობს. აღნიშნული მუხლის მიხედვით, ტრანსპორტის მოძრაობის უსაფრთხოების ან ექსპლუატაციის წესის დარღვევა, რამაც ადამიანის სიცოცხლის მოსპობა გამოიწვია, ისჯება თავისუფლების აღკვეთით ვადით ოთხიდან შვიდ წლამდე.