შინაგან საქმეთა სამინისტრომ ბათუმში 17 ნოემბერს მომხდარი არასრულწლოვნის დაჭრის საქმეზე 15 წლის პირი დააკავა.

გამოძიების ვერსიით, დაკავებულმა ლერმონტოვის ქუჩის მიმდებარე ტერიტორიაზე, ურთიერთშელაპარაკებისას, 2004 წელს დაბადებულ პირს ცივი იარაღით მიაყენა ჭრილობები და შემთხვევის ადგილიდან მიიმალა.

უწყების ცნობით, დაჭრილი საავადმყოფოშია გადაყვანილი, მის სიცოცხლეს საფრთხე არ ემუქრება.

გამოძიება განზრახ მკვლელობის მცდელობის საქმეზე, საქართველოს სსკ-ს 19-108-ე მუხლით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.