ხელისუფლების მიერ მხარდაჭერილი კანდიდატი, სალომე ზურაბიშვილი ამბობს, რომ პირველი ტურისთვის გადაღებული ფოტო, რომელიც ბანერებზე იყო გამოსახული, ნაკლებად მოსწონდა და მისი ჩანაცვლებით ბედნიერია. ასე გამოეხმაურა ზურაბიშვილი მის საარჩევნო კამპანიას, რომელშიც თვითონ ნაკლებად ჩანს.

"მე არ ვიცი, თქვენი მოსაზრება როგორი არის, მე ძალიან მომწონს ახალი სურათი და პირველი ტურის დროს, მე სულ ვამბობდი, რომ მე მეგონა, რომ ჩემი სურათი ცოტა ძალიან ბევრი იყო და ძალიან დიდი იმიტომ, რომ ეს არ არის ის ევროპული სტილი, რომელიც მომწონს და მე ეს სტილი ბევრად უფრო მომწონს, იმედი მაქვს, თქვენც", — აღნიშნა ზურაბიშვილმა.

15 ნოემბერს დილიდან თბილისსა და ბათუმში სალომე ზურაბიშვილის მხარდამჭერი ბანერები გამოჩნდა, რომელზეც თვითონ ზურაბიშვილის ნაცვლად ქართული ოცნების თავმჯდომარე, ბიძინა ივანიშვილი, პარლამენტის თავმჯდომარე, ირაკლი კობახიძე და პრემიერ-მინისტრი, მამუკა ბახტაძე არიან გამოსახული.

პარტია ქართული ოცნება ბილბორდებზე ლიდერების გამოჩენას პარტიის ახალი სტრატეგიით ხსნის. პარტიაში აცხადებენ, რომ მეორე ტურის კამპანიის ფარგლებში განახლდა სალომე ზურაბიშვილის საარჩევნო სლოგანიც. "ერთად საქართველოსთვის" "პრინციპულმა არჩევანმა" ჩაანაცვლა.

ამასთანავე, ფეისბუქით გავრცელდა სალომე ზურაბიშვილის ახალი საარჩევნო კლიპი, რომელშიც მმართველი გუნდის მხოლოდ კაცი ლიდერები მონაწილეობენ. აღნიშნული კლიპი სალომე ზურაბიშვილის არც ერთ ფეიჯზე არ არის განთავსებული და არც გადაზიარებულია.

ბილბორდებისა და სარეკლამო რგოლების გარდა, სალომე ზურაბიშვილი აღარ ჩანს მის მხარდასაჭერად გამართულ კონცერტებზეც.