რუსთავი 2-სა და პირველი არხის ინფორმაციით, გორში 14 წლის წინ გუჩინარებული 11 წლის ბავშვის ცხედარს ეძებენ.

როგორც რუსთავი 2 წერს, საგამოძიებო მოქმედებები გორის პარკში მიმდინარეობს. მათივე თქმით საუბარია, იაგო ნებიერიძის მიერ გატაცებულ ბავშვზე. ტელეკომპანიის ინფორმაციით, ნებიერიძე გამოსასყიდის მოთხოვნის ბრალდებით სასჯელსაც იხდიდა, მას ბავშვის გატაცება და მკვლელობა ვერ დაუდასტურდა. პირველი არხის განმარტებით, ცხედრის ადგილსამყოფელი გატაცების საქმის ერთ-ერთმა ფიგურანტმა "ი.ნ.-მ მიუთითა".

ამასთან დაკავშირებით On.ge დაუკავშირდა შინაგან საქმეთა სამინისტროს, თუმცა მათ ინფორმაცია არც უარყვეს და არც დაადასტურეს.

იაგო ნებიერიძეს გორში მიმდინარე წლის 25 ოქტომბერს გაუჩინარებული 9 წლის ნანა ბერიაშვილის გატაცებასა და მკვლელობაში ედება ბრალი. ბავშვის ცხედარი იმავე დღეს საღამოს მდინარე ლიახვის ნაპირზე იპოვეს. ახლობლები ყვებიან, რომ გოგო ხელ-ფეხშეკრული იპოვეს.

გამოძიება წინასწარი შეცნობით არასრულწლოვნის მიმართ დამამძიმებელ გარემოებაში ჩადენილი განზრახ მკვლელობის ფაქტზე, საქართველოს სისხლის სამართლის კოდექსის 109-ე მუხლის მე-2 ნაწილის "ბ" ქვეპუნქტით მიმდინარეობს. გარდა ამისა, ბრალდებულს ბრალი დაუმძიმდა სისხლის სამართლის კოდექსის 141-ე მუხლით დაუმძიმდა, რაც გარყვნილ ქმედებას გულისხმობს.

ამასთანავე გამოძიება გრძელდება 14 წლის წინ გაუჩინარებული 11 წლის მოზარდის საქმეზეც.

შეწყალების კომისიის თავმჯდომარის, ზვიად ქორიძის განცხადებით, 9 წლის გოგოს მკვლელობაში ბრალდებული შეწყალებული იყო.