ქალთა მოძრაობა სალომე ზურაბიშვილის ბილბორდებზე ქართული ოცნების კაცი ლიდერების გამოჩენას ეხმაურება და აცხადებს, საარჩევნო კამპანიიდან გაქრობა გენდერული თანასწორობის იდეას აზიანებს და კიდევ უფრო ხელს უწყობს ქალი პოლიტიკოსების მარგინალიზაციას.

განცხადებაში აღნიშნულია, რომ მმართველმა პარტიამ არ უნდა წარმოაჩინოს სალომე ზურაბიშვილი მსხვერპლად, კაცებთან შედარებით სუსტ პოლიტიკოსად და არ გაამყაროს გენდერული სტერეოტიპი ქალი პოლიტიკოსების მიმართ.

როგორც ქალთა მოძრაობა აცხადებს, საარჩევნო კამპანიის "დაბალი კულტურის" მიუხედავად, დღემდე გენდერული ნიშნით დისკრიმინაციული საარჩევნო კამპანია არც ერთ ანგარიშში არ დაფიქსირებულა, გარდა ცალკეული პოლიტიკური ლიდერების მხრიდან (მიხეილ სააკაშვილი, შალვა ნათელაშვილი) გაკეთებული რამდენიმე სექსისტური გამონათქვამისა:

"ამის მიუხედავად, მმართველი პოლიტიკური გუნდი გამუდმებით ცდილობს მათ მიერ მხარდაჭერილი ქალი კანდიდატის გენდერული დისკირმინაციის მსხვერპლად წარმოჩენას კონკრეტულ ფაქტებზე მითითების გარეშე".

სალომე ზურაბიშვილის ახალი ბილბორდები

15 ნოემბერს დილიდან თბილისსა და ბათუმში სალომე ზურაბიშვილის მხარდამჭერი ბანერები გამოჩნდა, რომელზეც თვითონ ზურაბიშვილის ნაცვლად ქართული ოცნების თავმჯდომარე, ბიძინა ივანიშვილი, პარლამენტის თავმჯდომარე, ირაკლი კობახიძე და პრემიერ-მინისტრი, მამუკა ბახტაძე არიან გამოსახული.

პარტია ქართული ოცნება ბილბორდებზე ლიდერების გამოჩენას პარტიის ახალი სტრატეგიით ხსნის. პარტიაში აცხადებენ, რომ მეორე ტურის კამპანიის ფარგლებში განახლდა სალომე ზურაბიშვილის საარჩევნო სლოგანიც.

საქართველოს პრემიერ-მინისტრის, მამუკა ბახტაძის განცხადებით, არაფერია განსაკუთრებული, რომ ქართული ოცნება სალომე ზურაბიშვილის საარჩევნო კამპანიაშია ჩართული, მათ შორის ბიძინა ივანიშვილიც.

პარლამენტის დეპუტატის ქართული ოცნებიდან ეკა ბესელიას თქმით, სალომე ზურაბიშვილისა და ქართული ოცნების ერთიანობის ხაზგასმა მეორე ტურის ახალი ბილბორდების მთავარი გზავნილია.

საფარის ხელმძღვანელი, ბაია პატარაია მიიჩნევს, რომ სალომე ზურაბიშვილის ბილბორდებზე ქართული ოცნების კაცი ლიდერების გამოჩენა "შოკისმომგვრელი სექსისზმი და სიბეცეა".

პატარაიას თქმით, ზურაბიშვილს სახე წაართვეს და მისი სახელი კაცებმა მიიტაცეს, რადგან ჰგონიათ, რომ სალომე არ ვარგა პოლიტიკოსად და თვითონ უკეთესები არიან. ეს კი, მისივე თქმით, "ყველა ქალის შეურაცხყოფაა და არა მხოლოდ სალომესი".