ევროკავშირიდან დიდი ბრიტანეთის გამოსვლის საკითხებში სახელმწიფო მინისტრი, დომინიკ რააბი გადადგა. მან განაცხადა, რომ არ შეუძლია "სუფთა სინდისით" მხარი დაუჭიროს პრემიერ-მინისტრის, ტერეზა მეის მიერ შემოთავაზებულ გეგმის პროექტს.

რამდენიმე საათით ადრე დიდი ბრიტანეთის მთავრობამ გეგმის პროექტს მხარი დაუჭირა. მანამდე კი ამ პროექტზე შეთანხმდნენ ტერეზა მეი და ევროკავშირი.

დომინიკ რააბი ბრექსიტის საკითხების მეორე მინისტრია, რომელიც წელს გადადგა. ივლისში ტერეზა მეის გეგმასთან შეუთანხმებლობის გამო გადადგა დევიდ დევისი. შემდეგ კი გადადგა საგარეო საქმეთა მინისტრი ბორის ჯონსონი.

დომინიკი რააბის წერილში საუბარია, რომ მას არ შეუძლია გეგმას მხარი დაუჭიროს, პირველ რიგში ჩრდილოეთ ირლანდიის განსაკუთრებული სტატუსის გამო, რომელიც, მისი თქმით, დიდი ბრიტანეთის ტერიტორიულ მთლიანობას უქმნის საფრთხეს.

დიდი ბრიტანეთიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს.

დიდი ბრიტანეთი ევროკავშირიდან საბოლოოდ 2019 წლის 29 მარტს უნდა გამოვიდეს. დოკუმენტის პროექტში საუბარია 21-თვიან გარდამავალ პერიოდზე და ე.წ. გაყრის კანონპროექტის დეტალებზე, რომლის მიხედვითაც ბრიტანეთმა ევროკავშირს 39 მილიარდი ფუნტ სტერლინგი უნდა გადაუხადოს.