"სვეტიცხოვლის საძმო" ფეისბუქზე ბერა ივანიშვილისა და ნანა გუდავაძეს ჯვრისწერის შესახებ გავრცელებულ ინფორმაციას, რომლის მიხედვითაც მლოცველები ტაძარში დროებით არ შეუშვეს, უარყოფს. ფეისბუქზე წერია, რომ ეკლესიიდამ მლოცველები არ "გამოუყრიათ".

"11 ნოემბერს სვეტიცხოველის ტაძარში ჯვარი დაიწერეს თეოდორე (ბერა) ივანიშვილმა და ნანა გუდავაძემ. სამწუხაროდ, შემდეგ გავრცელდა არასწორი ინფორმაცია, თითქოს სვეტიცხოველიდან ამის გამო გამოყარეს მლოცველები. ასეთ ფაქტს ადგილი არ ჰქონია და ეს ნათქვამი არ შეეფერება სინამდვილეს", — ნათქვამია განცხადებაში.

პარტია ქართული ოცნების დამფუძნებლისა და თავმჯდომარის, ბიძინა ივანიშვილის შვილის ბერა ივანიშვილის ჯვრისწერის გამო სვეტიცხოველი ვიზიტორებისთვის დროებით დაიკეტა. ბერა ივანიშვილის ჯვრისწერას პირდაპირ ეთერში გადმოსცემდა ტელეკომპანია პირველი. კადრებში ჩანდა, რომ სვეტიცხოვლის მთავარ შესასვლელთან მობილიზებული იყო დაცვა, ტაძრის ვიზიტორებს ეზოში გადაადგილება შეეძლოთ. ტაძრის შიდა სივრცე მიუწვდომელი იყო ჟურნალისტებისთვისაც. ტაძარში ცერემონიას პოლიტიკოსებიდან მხოლოდ ყოფილი პრემიერი, ირაკლი ღარიბაშვილი დაესწრო.