"უარს ვამბობ ნაძვის ხეზე, ვირჩევ ადამიანს!" — რამდენიმე წუთის წინ ამ სახელწოდების პეტიცია შეიქმნა შვილმკვდარი მამის, ზაზა სარალიძის მხარდასაჭერად. ხელმომწერები ამ პეტიციით თბილისის მერიის გადაწყვეტილებას აპროტესტებენ. მერია ითხოვს, რომ შვილმოკლულმა მამებმა პარლამენტის მიმდებარე ტერიტორია დატოვონ, რადგან იმ ადგილზე საახალწლო ნაძვის ხე ააწყონ.

"ჩვენ უარს ვამბობთ საახალწლო ნაძვის ხეზე, თუკი ხელისუფლება და თბილისის მთავრობა გვაიძულებს, არჩევანი გავაკეთოთ ადამიანის ფეხქვეშ გათელილ უფლებასა და ნაძვის ხეს შორის. ჩვენ ვირჩევთ ადამიანს, უარს ვამბობთ საახალწლო ნაძვის ხეზე", — ვკითხულობთ პეტიციაში.

ამ დროის [20 ნოემბერი, 22:54] მონაცემებით, პეტიციას 181 ხელმომწერი ჰყავს.

რამდენიმე დღის წინ შვილმოკლულმა მამამ, ზაზა სარალიძემ თბილისის მერიისგან წერილი მიიღო, სადაც აღნიშნული იყო, რომ თბილისში, პარლამენტის შენობის მიმდებარე ტერიტორია უნდა დაეტოვებინა. ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.