ნადეჟდა სავჩენკოს პატიმრობის შესახებ მომზადებული რეზოლუცია, 15 აპრილის პლენარულ სხდომაზე 85 ხმით მიიღეს.

დოკუმენტში, საქართველოს პარლამენტი რუსეთის ხელისუფლებას მოუწოდებს, რომ დაუყოვნებლივ გაათავისუფლოს ნადეჟდა სავჩენკო და სხვა უკანონოდ დაკავებული უკრაინის მოქალაქეები ან გადასცეს ისინი უკრაინას.

ასევე, არ დაუშვას სავჩენკოსა და სხვა უკანონოდ დაკავებული უკრაინის მოქალაქეების მძევლად გადაქცევა, მათი სიცოცხლისათვის საფრთხის შექმნა და მათი ფუნდამენტური უფლებების დარღვევა.

როგორც პარლამენტის რეზოლუციის ტექსტშია აღნიშნული, რუსეთის ფედერაცია, ვალდებულია, პატივი სცეს საერთაშორისო სამართლით ნაკისრ ვალდებულებას, რადგან 2015 წლის იანვრიდან, სავჩენკო სარგებლობს ევროპის საბჭოს საპარლამენტო ასამბლეის წევრის საპარლამენტო იმუნიტეტით.

რეზოლუციის ინიციატორია საპარლამენტო ფრაქცია თავისუფალი დემოკრატები.