პარტია ევროპული საქართველოს დეპუტატი, ოთარ კახიძე აცხადებს, რომ კანაფის კონტროლის კანონპროექტის პარლამენტში განსახილველად ხელმეორედ დაბრუნება არჩევნების მეორე ტურში ქართული ოცნების მხარდაჭერილი კანდიდატის, სალომე ზურაბიშვილის შედეგზე იქნება დამოკიდებული.

დეპუტატი On.ge-სთან საუბარში ამბობს, რომ კანაფის კონტროლის შესახებ კანონი პირადად ბიძინა ივანიშვილის ინიციატივაა და ქვეყანაში გადაწყვეტილებების მიღება მხოლოდ ერთი პირის "კაპრიზებზეა" დამოკიდებული.

"ეს არ იყო პოლიტიკური ან ეკონომიკური გუნდის გადაწყვეტილება. ბიძინა ივანიშვილი ამ ქვეყანას უყურებს, როგორც საკუთარ ბოსტანს, სადაც აქვს ხიბლი, რომ მილიარდები იშოვოს, ამიტომ გადაწყვიტა კანაფის პლანტაციები გაეშენებინა. ამას მოჰყვა საზოგადოების რეაქცია. ყველა ნორმალური ადამიანისთვის მიუღებელია, რომ ერთი პირის კაპრიზებზე იყოს დამოკიდებული ქვეყანაში ასეთი საკითხების გადაწყვეტა და ივანიშვილმა, როგორც ჩანს, გადაწყვიტა გაიწვიოს ეს კანონპროექტი, დაელოდოს მეორე ტურის შედეგებს და გადაწყვიტოს განაახლებს თუ არა ამ საკითხის განხილვას", — თქვა ოთარ კახიძემ.

დეპუტატის განცხადებით, ხელისუფლება გამიჯნული უნდა იყოს ეკლესიისგან და მისი მოქმედებები ნაკარნახევი უნდა იყოს მათი ანგარიშვალდებულებით ხალხის მიმართ.

"ხელისუფლება მოწყვეტილია რეალობას და ცდილობს, საპატრიარქოსგან და შავრაზმული დაჯგუფებებისგან ყველანაირი დივიდენდები მიიღოს", — განაცხადა დეპუტატმა.

გადაწყვეტილებები მეორე ტურის წინ

28 ოქტომბრის შედეგების შემდეგ მმართველმა გუნდმა "შეცდომების გამოსწორებაზე" დაიწყო საუბარი. მეორე ტურისთვის მოსამზადებლად საპარლამენტო უმრავლესობის წევრები ცენტრალურ ოფისში პარტიის თავმჯდომარეს, ბიძინა ივანიშვილსაც შეხვდნენ.

ქართული ოცნების მიერ მხარდაჭერილი კანდიდატისთვის, სალომე ზურაბიშვილისთვის მიცემული ხმების ნაკლებობა დეპუტატებმა სხვადასხვანაირად ახსნეს. მაგალითად, დეპუტატი კარლო კოპალიანი მიიჩნევს, რომ თუ "ხალხს მოეფერებიან" და მათი პრობლემებით დაინტერესდებიან, მეორე ტურში აუცილებლად გაიმარჯვებენ.

გია ჟორჟოლიანს მიაჩნია, რომ 28 ოქტომბერს საპრეზიდენტო არჩევნებზე მოსახლეობის უმეტესობამ უკმაყოფილება გამოხატა მმართველი გუნდის პოლიტიკის, კერძოდ, ეკონომიკური პოლიტიკის და არა სალომე ზურაბიშვილის მიმართ.

კიდევ ერთ მიზეზად კანაფის კულტივაციის კანონპროექტი დასახელდა. რამდენიმე დღის წინ ჯანდაცვის კომიტეტის თავმჯდომარე აკაკი ზოიძე და კიდევ რამდენიმე დეპუტატი ითხოვდნენ, რომ კანონპროექტი უკან გაწვეულიყო. ამის შემდეგ კი შინაგან საქმეთა მინისტრი, გიორგი გახარია და პარლამენტის თავმჯდომარე, ირაკლი კობახიძე პატრიარქს შეხვდნენ და კანონი უკან გაიწვიეს.

კიდე ერთი ინიციატივა, რომელიც მეორე ტურის წინ მმართველმა გუნდა დააანონსა საკონსტიტუციო სასამართლოს გადაწყვეტილებების შეზღუდვაა. კობახიძის თქმით, იმსჯელებენ ცვლილებებზე, რომელიც ნარკოპოლიტიკის საკითხებში საკონსტიტუციო სასამართლოს გადაწყვეტილებებს შეზღუდავს.

საქართველოს საპატრიარქოში შეხვედრის შემდეგ მთავრობამ გადაწყვეტილება მიიღო და კანაფის კონტროლის შესახებ კანონპროექტს პარლამენტიდან გაიწვევს. ამის შესახებ ჟურნალისტებს პატრიარქთან შეხვედრის ერთ-ერთმა მონაწილემ, შინაგან საქმეთა მინისტრმა, გიორგი გახარიამ განუცხადა.

კანაფის კონტროლის შესახებ კანონპროექტი

შინაგან საქმეთა სამინისტროს მიერ შემუშავებული კანონპროექტი "მცენარე კანაფის კონტროლის" შესახებ სამედიცინო მიზნით მარიხუანის დათესვას, მოყვანა და კულტივაციას გულისხმობს. კანონპროექტის მიხედვით, მარიხუანის მხოლოდ ექსპორტი იქნება დაშვებული, ხოლო იმპორტი აკრძალული. ასევე აიკრძალება არასამედიცინო მიზნით კანაფის კულტივაციაც.

დოკუმენტი 131 გვერდიანია და დამტკიცების შემდეგ, სულ მცირე 10 კანონში გამოიწვევდა ცვლილებას. კანონპროექტს როგორც ეკლესიიდან, ისე საზოგადოებისგან კრიტიკა მოჰყვა. საქართველოს საპატრიარქომ განცხადება გაავრცელა, სადაც აღნიშნა, რომ სრულიად მართლმადიდებელი ეკლესია და მრევლი ეწინააღმდეგება ნებისმიერი მიზნისთვის მარიხუანის რეალიზაციის ლეგალიზებას.

კანონპროექტის გადავადების გადაწყვეტილება უმრავლესობამ მას შემდეგ მიიღო, რაც აღნიშნულ ინიციატივას საქართველოს მართლმადიდებელი ეკლესია დაუპირისპირდა. პარლამენტში კანონპროექტის უკან გაწვევაზეც მსჯელობდნენ. ორი დღის წინ კი საპარლამენტო უმრავლესობის ნაწილმა, ჯანდაცვის კომიტეტის წევრებმა მთავრობისგან კანონპროექტის უკან გაწვევა მოითხოვეს.