ამ წუთებში თეთრი ხმაურის მოძრაობა საქართველოს მთავრობის კანცელარიასთან საპროტესტო აქციას მართავს, ლოზუნგით "თეთრი ხმაურის მოძრაობა დემურ სტურუასთვის, პოლიციური ძალადობის წინააღმდეგ".

აქციის მონაწილეები პრემიერსა და ვიცე-პრემიერს მიმართვას უგზავნიან, რის შემდეგაც სამტრედიაში გადაინაცვლებენ და პოლიციის შენობის წინ გამართავენ მთავარ აქციას.

"22 წლის დემურ სტურუას ფიზიკური და ფსიქოლოგიური ძალადობის გამოყენებით პოლიციასთან თანამშრომლობასა და თანასოფლელების დასმენას აიძულებდნენ, რამაც ის თვითმკვლელობამდე მიიყვანა.

სტურუას თვითმკვლელობის ფაქტმა კიდევ ერთხელ დაგვანახა, რომ პოლიციისთვის მინიჭებული ძალაუფლება აჭარბებს გონივრულ და ლეგალურ ფარგლებს. ის, რაც ნარკოპოლიტიკით ინიღბება, სინამდვილეში მოქალაქეებზე, განსაკუთრებით კი სოციალურად დაუცველ ფენებზე, პოლიციური კონტროლის, ძალადობისა და შანტაჟის მექანიზმს წარმოადგენს. ეს მექანიზმები განსაკუთრებული სიმკაცრით საჯარო სივრცის მიღმა მყოფ ადამიანებს უსწორდება, მისი მოქმედების ძირითად სივრცეებს კი რეგიონები, სოფლები და გარეუბნები წარმოადგენენ.

დემურ სტურუას თვითმკვლელობის აქტი საპროტესტო გზავნილია, რომელიც თითოეულ მოქალაქეს მოგვემართება. სახელმწიფოს მიერ მასზე განხორციელებული პოლიციური ძალადობა საკადრის პასუხს საჭიროებს.

სწორედ ამიტომ, მოვითხოვთ:

  1. პასუხისმგებლობაში მიეცეს პოლიციელი გოდერძი თევზაძე და მისი მეწყვილე, რომლის ვინაობასაც პოლიცია ამ დრომდე ასაიდუმლოებს;
  2. თანამდებობა დატოვოს სამტრედიის რაიონული პოლიციის უფროსმა;
  3. შსს-ს მინისტრმა საზოგადოებრივი ორგანიზაციების მონაწილეობით შექმნას მონიტორინგის ჯგუფი, რომელიც თბილისსა და რეგიონებში პოლიციის მხრიდან ძალის გადამეტებისა და შანტაჟის პრაქტიკებს შეისწავლის;
  4. დაუყოვნებლივ გადაიდგას ქმედითი ნაბიჯები რეპრესიული ნარკოპოლიტიკის შესაცვლელად".

12 აგვისტოს გავრცელდა დემურ სტურუას თვითმკვლელობამდე დატოვებული წერილი, რომელშიც ის პოლიციელ მუქარასა და ძალადობაში ადანაშაულებდა.