მოძრაობა რუსეთი ოკუპანტიას წევრებმა სალომე ზურაბიშვილს "ვენოკი" მიუტანეს. პერფომანსის მიზანი ზურაბიშვილის პირველ ტურში "დამარცხების" ხაზგასმა იყო.

სალომე ზურაბიშვილის შტაბიდან რამდენიმე პირი გამოვიდა, რომლებმაც "ვენოკი" გაიტანეს. აქტივისტების მისვლიდან რამდენიმე წუთში, ადგილზე პოლიცია მივიდა, რომელმაც სამართალდარღვევის ოქმი შეადგინა.

პოლიციამ სამოქალაქო აქტივისტების და On.ge-ს ჟურნალისტის პირადი მონაცემები ჩაიწერა. აქტივისტებმა შტაბის ტერიტორიიდან "ვენოკი" თავად გაიტანეს.

"ქალბატონო სალომე ვიზიარებთ", — ასე მიმართეს მოძრაობის წევრებმა ეზოდან სალომე ზურაბიშვილს და "ვენოკზე" წარწერა დატოვეს.

ფოტო: გიორგი შეყელაძე / On.ge

თვალი ადევნეთ On.ge-ს ლაივს აქციიდან.

ცენტრალური საარჩევნო კომისიიის წინასწარი მონაცემებით, რომელიც 512 უბნის შედეგებს ეყრდნობა არჩევნების მეორე ტური გაიმართება. ცესკოს თავმჯდომარის, თამარ ჯვანიას განცხადებით, ამ ეტაპზე ლიდერობს სალომე ზურაბიშვილი 40,05%-ით და მეორე ადგილზეა გრიგოლ ვაშაძე 37,93%-ით.

მეორე ტურის გამართვა აღიარა ქართული ოცნების თავმჯდომარემ, ირაკლი კობახიძემაც. მისი თქმით, მეორე ტურში ვაშაძე და ზურაბიშვილი გადავლენ.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით მათმა მხარდაჭერილმა კანდიდატმა, სალომე ზურაბიშვილმა გაიმარჯვა. მათი თქმით, 28.1 % აქვს გაერთიანებული ოპოზიციის კანდიდატს, გრიგოლ ვაშაძეს და 9.2% ევროპული საქართველოს კანდიდატს, დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

რუსთავი 2-ის მიერ ჩატარებული ეგზიტპოლის შუალედური შედეგებითაც სალომე ზურაბიშვილს და გრიგოლ ვაშაძეს 40-40% ქონდათ, დავით ბაქრაძეს კი — 10%.