არჩევნების დღეს, 28 ოქტომბერს არაერთმა არასამთავრობო ორგანიზაციამ, ოპოზიციურმა პარტიამ და სამოქალაქო აქტივისტმა განაცხადა, რომ ქართული ოცნების კოორდინატორები მოქალაქეებს არჩევნებზე მისვლას აიძულებენ. მათი თქმით, ეს პირები საარჩევნო უბნებთან სიებით მოძრაობენ და ამომრჩევლებს ურეკავენ.

ტელეკომპანია რუსთავი 2-მა გაასაჯაროვა ერთ-ერთი კოორდინატორის რვეულის ფოტო, სადაც რამდენიმე პირის საკონტაქტო ნომერი და პირადი ინფორმაცია წერია.

On.ge ამ რვეულში მითითებულ რამდენიმე ნომერს დაუკავშირდა და ქართული ოცნების წარმომადგენლის სახელით გაესაუბრა. აღნიშნულ პირებს რვეულში მითითებული სახელი და გვარით მივმართეთ და დაგვიდასტურეს, რომ თავად არიან.

მათ ვკითხეთ იყვნენ თუ არა შეთანხმებული კოორდინატორებთან არჩევნებზე მისვლის შესახებ და ვის აძლევდნენ ხმას. სატელეფონო საუბარში გვითხრეს, რომ ნომრები კოორდინატორებს თავად ჩააწერინეს.

ამომრჩეველთა ნაწილს არ სურდა ეთქვა ვის აძლევს ან მისცეს ხმა. მას შემდეგ კი რაც ვუთხარით, რომ ოცნების მხარდამჭერთა სიაში ფიქსირდებოდნენ და კითხვას ამიტომ ვსვამდით მივიღეთ პასუხები: "მაშინ ოცნებას", "რა თქმა უნდა, თქვენს სასარგებლოდ მივეცი ხმა", "ქართულ ოცნებას", "სალომე ზურაბიშვილს".

On.ge გთავაზობთ რამდენიმე საუბრის ჩანაწერს. იდენტიფიცირების თავიდან ასაცილებლად საუბრიდან ამოჭრილია აღნიშნული პირების სახელები და გვარები.

საარჩევნო კოდექსით პარტიის კოორდინატორობა არ იკრძალება და დარღვევად არ მიიჩნევა, თუმცა არასამთავრობო ორგანიზაციები აცხადებენ, რომ ეს ამომრჩევლის ნებაზე გავლენაა.