"საქართველოში გვაქვს რისკი იმისა, რომ ჭარბვალიანობა სისტემურ პრობლემაში გადავიდეს", - ამის შესახებ საქართველოს პრემეირ-მინისტრმა, მამუკა ბახტაძემ, საბანკო რეგულაციების შემოტანასა და დედოლარიზაციაზე საუბრისას განაცხადა.

მისი თქმით, ჭარბვალიანობის სისტემურ პრობლემაზე საუბარი მხოლოდ მისი მოსაზრება არ არის და საერთაშორისო დონორები საკუთარ ანგარიშებზე ამ პრობლემებზე წერენ.

"საბანკო რეგულაციების შემოტანა არის სწორი ნაბიჯი ისევე, როგორც სწორი ნაბიჯია ქვეყანაში დედოლარიზაციის პროცესის დაჩქარება, რომ საქართველო გავხადოთ მოწყვლადი გარე ფაქტორების მიმართ. მე, რა თქმა უნდა, მხარს ვუჭერ იმ პოლიტიკას, რაც მიმართულია დედოლარიზაციისკენ და ჭარბვალიანობის შემცირებისკენ", - განაცხადა მამუკა ბახტაძემ.
მისი თქმით, მთავრობის მთავარი მიზანია მიაღწიოს მდგრად და ინკლუზიურ ზრდას საქართველოში.

"თუ ჩვენი ეკონომიკური მოდელი იქნება მყიფე გარე ფაქტორების მიმართ ის ვერასდროს იქნება მზარდი და სამწუხაროდ, საქართველომ ბევრჯერ გამოსცადა, რამდენად მძიმეა გარე ფაქტორების შედეგები", - განაცხადა პრემიერ-მინისტრმა.

მან ყოფილ პრემიერზე, გიორგი კვირიკაშვილზე ბიძინა ივანიშვილის განცხადებასაც გამოეხმაურა, რომლის მიხედვითაც კვირიკაშვილი დაგვიანებული რეფორმების გამო დაისაჯა.

"რა თქმა უნდა, საქართველოს მთავრობას, ჩვენ გვმართებდა ამ რეგულაციებისა და მტკივნეული პრობლემის გადაჭრაზე კონკრეტული ნაბიჯების გადადგმა გაცილებით ადრე", - განაცხადა პრემიერმა.