თურქეთის ხელისუფლება ქვეყნის პრეზიდენტის, რეჯეპ ტაიპ ერდოღანის მიერ გამოცხადებულ ე.წ. წმენდას აგრძელებს. სამართალდამცავმა უწყებამ ბიზნესის სფეროში მომუშავე სხვადასხვა პირის დაკავების მიზნით, 187 ორდერი გასცა, ხოლო 200-მდე საცხოვრებელ სახლში რეიდები განხორციელდა. ამის შესახებ ინფორმაციას Reuters ავრცელებს.

როგორც ცნობილია, პოლიციის ფინანსურ დანაშაულებზე მომუშავეგანყოფილებამ რეიდები სტამბოლსა და თურქეთის სხვა 17 ქალაქში იმისთვის განახორციელა, რომ აშშ-ში მცხოვრებ ფეტულა გიულენთან დაახლოებული პირები გამოეშკარავებინა.

როგორც ადგილობრივი გამოცემა Anadolu იტყობინება, უამრავი ადამიანი საკუთარ საცხოვრებელ სახლებსა და ოფისებში დააკავეს.

17 აგვისტოს ქვეყნის პრემიერმინისტრმა, ბინალი ილდიმირიმ განაცხადა, რომ 15 ივლისს მომხდარი ამბოხის შემდეგ თურქეთი 40 029 ადამიანია დაკავებული. გარდა ამისა, გიულენთან კავშირის ბრალდებით 4262 კომპპანია დახურეს, 79 900 პირს კი თანამდებობა დაატოვებინეს.

ამასთან თურქეთის ხელისუფლებამ გუშინ ოპოზიციური ძალის 10 ლიდერი დააკავა, ხოლო ქვეყნის იუსტიციის მინისტრმა, ბეკირ ბოზდაგმა განაცხადა, რომ თურქეთის ხელისუფლება 38 ათასი პატიმრის გათავისუფლებას აპირებს იმისთვის, რომ 15 ივლისს მომხდარი სახელმწიფო გადატრიალების მცდელობაში ბრალდებული პირებისათვის ციხეებში ადგილები გაათავისუფლოს.

15 ივლისს თურქეთში, ხელისუფლების დამხობის მიზნით, ქვეყნის რამდენიმე ლოკაციაზე შეიარაღებული დაჯგუფების თავდასხმას 300-მდე ადამიანის სიცოცხლე ემსხვერპლა, აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.

გარდა ამისა, დახურულია 130-მდე მედიასაშუალება, დაკავებულები არიან ჟურნალისტები. ქვეყანაში სამთვიანი საგანგებო მდგომარეობაა გამოცხადებული.

თურქეთში მომხდარი ამბოხის გამომწვევი მიზეზების, მისი ორგანიზატორებისა და მომხდარის შესახებ დეტალურ ინფორმაციას შეგიძლიათ გაეცნოთ აქ: