"ტელევიზია იბერიას შენახვა ძვირი არ ღირს", — ასე გამოეხმაურა ქართული ოცნების თავმჯდომარე ბიძინა ივანიშვილი ომეგა ჯგუფისა და იბერიის საქმეს. ამის შესახებ ივანიშვილმა სამ ჟურნალისტთან ინტერვიუს დროს ისაუბრა.

ივანიშვილის თქმით, ომეგა ჯგუფის დირექტორი ზაზა ოქუაშვილი სახელმწიფოს ფულს არ უხდიდა რის გამოც ქარხანა დაუყადაღეს და სწორედ ამის შემდეგ დაიწყეს შანტაჟი.

"კაცი რომელიც 50 000 არ უხდის სახელმწიფოს რამდენად სანდოა?", — მიმართა ჟურნალისტებს ივანიშვილმა.

ივანიშვილმა მანამდე აღნიშნა, რომ სპორტის ყოფილ მინისტრს, ლევან ყიფიანსა და ზაზა ოქუაშვილს მის სახლში ორჯერ შეხვდა. ივანიშვილის თქმით, შეხვედრაზე განიხილეს სამომავლო ბიზნესიდეები.

ტელეკომპანია იბერიამ რამდენიმე დღის წინ განაცხადა, რომ საინფორმაციო გამოშვებები ეთერში აღარ გავა და მაუწყებლობას აჩერებენ. კომპანიაში ამის მიზეზად ასახელებენ ხელისუფლების მხრიდან შემოსავლის წყაროს შეზღუდვას.

იბერიის დამფუძნებელი ზაზა ოქუაშვილია, რომელიც ომეგა ჯგუფის დირექტორია. ომეგა ჯგუფის ანგარიშებს ყადაღა ადევს, სახელმწიფოსთან ვალის გამო.

ამავე თემაზე: