"ფარცხალაძე რატომ უნდა დავსაჯო გაუგებარია და ბიზნესმენებთან შეხვედრა რატომ არის დანაშაული", — ამის შესახებ ქართული ოცნების თავმჯდომარემ, ბიძინა ივანიშვილმა 3 ჟურნალისტთან ინტერვიუსას ისაუბრა.

ივანიშვილმა დაადასტურა, რომ სპორტის ყოფილი მინისტრი, ლევან ყიფიანი და ომეგა ჯგუფის დირექტორი, ზაზა ოქუაშვილი მასთან ორჯერ იყვნენ მისული. თუმცა, მისივე თქმით, გაუგებარია რატომ გახდა ეს პრობლემა.

ივანიშვილის განცხადებით, რუსთავი 2-ის მიერ გავრცელებულ ჩანაწერებში არ ჩანს რომ ოქუაშვილი მასთან პრობლემის მოსაგვარებლად მივიდა. ივანიშვილმა აღნიშნა, რომ ის ხშირად ხვდება ბიზნესმენებს და ოქუაშვილსაც იმიტომ შეხვდა, რომ ახალი პროექტები განეხილათ.

"ბიზნესმენების სიარული დღესაც გაგრძელდება ჩემთან და ეს არის ძალიან კარგი. რამეთუ ბიზნესია საფუძველი დასაქმების, რათა სიმდიდრე შეიქმნას ამ ქვეყანაში", — განაცხადა ივანიშვილმა.

ივანიშვილმა რუსთავი 2-ის მიერ გავრცელებული ჩანაწერების ავთენტურობაზეც ისაუბრა. მისი თქმით, ორმა ბრიტანულმა საექსპერტო ბიურომ და სამხარაულის ექსპერტიზამ დაადასტურა, რომ ჩანაწერი ავთენტური არ არის. თუმცა, ჟურნალისტების დამაზუსტებელ კითხვაზე, ჰქონდა თუ არა მას ამ ბიუროების დასკვნა, ან შეეძლო თუ არა თქმა სად შეიძლება მათი ნახვა ივანიშვილმა კონკრეტული პასუხი არ გასცა.

ივანიშვილმა ასევე აღნიშნა, რომ "ოთხი თითის ეპიზოდი" ჩანაწერიდან არასერიოზულია. მისი თქმით, საკუთარ კაბინეტში არ დაჭირდებოდა 4 თითის ჩვენება და საუბარს ღიად შეძლებდა. თუმცა, ასევე აღნიშნა ის, რომ მის სახლში ჩაწერა ნებისმიერს შეუძლია.