ჩვენ, მსუნაგებმა ვიცით, რომ ძალიან კარგი ხალხი ვართ და სავარაუდოდ, ამას სხვებიც მარტივად ხვდებიან. ჩვენ ირგვლივ ხომ ყოველთვის მოიძებნება გემრიელი საჭმელი და შესაბამისად, პოზიტიური განწყობის საუკეთესო მიზეზიც.

მართალია, ჩვენზე საუბარი დაუსრულებლად შეიძლება, მაგრამ ნახეთ 15 კონკრეტული სიტუაცია, რომელიც ყველა მსუნაგისთვის ძალიან ნაცნობი იქნება:

1. მსუნაგი ადამიანები ზოგჯერ იმიტომ ვთანხმდებით მეჯვარეობაზე, რომ გემრიელად ვჭამოთ, მაგრამ ეს არაფერს ნიშნავს!

2. სუფრაზე ყველაზე ხშირად სწორედ ჩვენგან მოისმენენ ფრაზას - "გადმომაწოდე რა"

3. წვეულებაზე ყველაზე ყურადღებიანი სტუმარი ვართ და სხვებსაც აქტიურად ვთავაზობთ სხვადასხვა კერძის ჭამას

4. ჩვენი სახლი, სხვა მსუნაგებისთვის ნამდვილი სამოთხეა, რადგან შთამბეჭდავი რაოდენობის სასუსნავებს ვინახავთ

5. დღის განმავლობაში მაცივარს მინიმუმ 30-ჯერ უაზროდ ვაღებთ და ვკეტავთ (აზრიანად კი გაცილებით მეტჯერ)

6. თუ ვერავინ გვხედავს, საჭმელს პირდაპირ ქვაბიდან ვჭამთ და გულწრფელად ვერ ვიგებთ - რა საჭიროა ზედმეტი ჭურჭლის დასვრა?!

7. დაბადების დღეზე მეგობარს გვირჩევნია საჭმელი ვაჩუქოთ, მაგალითად ტორტი, ნამცხვარი ან ძვირადღირებული შოკოლადი - "გახსენი, გამასინჯე ერთი რა გიყიდე" ფრაზით.

8. ყოველთვის ვფიქრობთ, რომ მასპინძელს მეტი საჭმლის მომზადებაც შეეძლო და ძალიან სამართლიანადაც (ფურშეტი-მურშეტი არაა საჩვენო საქმე)

9. პიკნიკზე როცა ვართ, ნახევარფაბრიკატების ამოცნობა სულაც არ გვიჭირს და ბრაზისგან ერთი სული გვაქვს, რომ მეგობარი წლის მთავარ ტყუილში ვამხილოთ!

10. ოფისში თავს ისე ვგრძნობთ, როგორც საკუთარ სახლში, რადგან თანამშრომლების საჭმელიც ჩვენი არ არის?!

11. ოჯახის წევრი, რომელიც მხოლოდ უგემურ ბოსტნეულს მიირთმევს კი მისდა უნებურად მოტივაციას გვაძლევს, რომ დღეს ჯანსაღად ვიკვებოთ და რა თქმა უნდა, ამას მისი ულუფის 50%-ის მითვისებით ვიწყებთ!

12. მართალია, ჩვენ გარდა ასე არავინ იქცევა, (ეგრეც რომ იყოს, მერე რა?!) მაგრამ ჩვენ არასდროს დავუშლით სხვებს სამარშუტო ტაქსიში ჭამას. წერტილი.

13. პაემანზე წასვლამდე გვიწევს, რომ კარგად ვჭამოთ. რა ჩვენი ბრალია, თუ ადამიანებს დრო სჭირდებათ იმის მისახვედრად, რომ ჭამის დროს ყველაზე საყვარლები ვართ

14. სასეირნოდ გასვლისას ხელს რომ ერთი-ორი შოკოლადიც უნდა გავაყოლოთ არასდროს გვავიწყდება! აბა, რომელიმე გამვლელს რომ უეცრად სისხლში შაქრის დონე დაუვარდეს, მერე სად წავიდეთ?!

15. სიყვარულის გამოხატვა ყველაზე უკეთ ჩვენ გამოგვდის და ადამიანებს ხან ტირამისუს და ხანაც, მარწყვის მურაბას ვადარებთ