თითქმის არარეალურია იმის წარმოდგენაც კი, რომ ჩვენი ოცნებების ახდენაში, შესაძლოა, ის ცნობილი ადამიანი დაგვეხმაროს, რომელიც წლებია ძალიან გვიყვარს. არ აქვს მნიშვნელობა მსახიობია, მუსიკოსი თუ ფეხბურთელი. ყველაზე თამამ ოცნებაშიც კი ვერ დავუშვებთ, რომ ის არამხოლოდ გაიგებს ჩვენს არსებობაზე, სანუკვარ სურვილებსაც უანგაროდ აგვიხდენს.

თუმცა, ყველაფერი ხდება. დაახლოებით 10 დღის წინ, 19 წლის გიორგი ქოქიაშვილმა ფეისბუქზე სტატუსი დაწერა, სადაც მეგობრებს ფლეისთეიშენის შესაძენად დახმარება სთხოვა. მისი სიტყვებით, საჭირო თანხის თითქმის 30 პროცენტი უკვე შეგროვებული ჰქონდა, როდესაც საქართველოს ნაკრების თავდამსხმელმა ლევან მჭედლიძემ მას ინსტაგრამზე მისწერა.

"მე გაჩუქებ, თბილისში მაქვს. დავურეკავ და მოგაწვდიან. შეგიძლია წაშალო პოსტი", - მისწერა მას მჭედლიძემ.

როგორც გიორგი წერს, მეორე დღეს მან მჭედლიძისგან ვიდეოც მიიღო, სადაც ფეხბურთელმა მას უთხრა, რომ მისი ოჯახის წევრები მალე დაუკავშირდებოდნენ.

"საბოლოოდ, დღეს მისგან მივიღე ახალი წერილი, სადაც მისი მეგობრის ნომერი გამომიგზავნა, რომელსაც შევხვდი და მივიღე ნანატრი, მრავალჯერ ნაფიქრი საჩუქარი, რომელზეც ბავშვობიდან ვოცნებობდი. Playstation 4 PRO, 1TB მოცულობის, საყვარელი თამაშის, FIFA 18-ის დისკით.

როდესაც დავდე და ჩავრთე, დავფიქრდი, რამდენად კეთილთვისებიანად არის მოწყობილი ეს სამყარო, მიუხედავად ათასი უბედურებისა, რომელიც ბავშვობიდან არ მაკლდა, რომ ბავშვობის ოცნებას მისრულებს, ბავშვობის ერთ-ერთი საყვარელი ქართველი ფეხბურთელი, რომლისთვისაც სრულიად უცხო პიროვნება ვარ", - წერს გიორგი.

ლევან მჭედლიძე იტალიურ საფეხბურთო კლუბ ემპოლშიც თამაშობს, თუმცა ახლა ტრავმის გამო, შეხვედრებში მონაწილეობას ვერ იღებს.