სამტრედიის რაიონში გარდაცვლილი დემურ სტურუას მეგობარი, ოლეგ თავაძე, დასავლეთ საქართველოს საოლქო პროკურატურაში დაკითხეს. ის, ისევე როგორც სტურუა, პოლიციელ გოდერძი თევზაძეს ფიზიკურ ზეწოლასა და შეურაცხყოფაში ადანაშაულებს.

როგორც თავაძე ამბობს, აღნიშნული პოლიციელი მასზე ფიზიკურ და ფსიქოლოგიურ ზეწოლას 5 წლის განმავლობაში ახორციელებდა. ის ასევე დარწმუნებულია, რომ სტურუა თვითმკვლელობამდე სწორედ თევზაძემ მიიყვანა:

"როდესაც ერთმანეთს შევხვდებოდით, ჩვენი შეხვედრა მთავრდებოდა ფიზიკური, სიტყვიერი და ფსიქოლოგიური ზეწოლით. ის ყოველთვის ითხოვდა ჩემგან პოლიციასთან თანამშრომლობას. მე მისთვის უნდა მიმეწოდებინა ინფორმაცია, თუ ვის ჰქონდა სოფელში დარგული ე.წ. მარიხუანა და ინფორმაცია სისხლის სამართლის სხვა დანაშაულებზე, რომლებიც მათთვის იყო ცნობილი, გამოვსულიყავი სასამართლოზე მოწმედ და ცრუ ჩვენებით დავხმარებოდი მათ საქმის "გაპრავებაში". დღეს პასუხები გავეცი პროკურატურის შეკითხვებს".

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა:

"პოლიციელი გ. მემუქრებოდა ვინმეს პლანი ხო არ აქო დათესილიო, უნდა მითხრაო. თორემ რაც არ გაგიკეთებია, იმას შეგტენიო, მემუქრებოდა და მანქანაში გამლახა, წამიყვანა იანეთისკენ და აქ მოგკლავო. მემუქრებოდა გ. თ. - მილიციელი. მილიციასთან უნდა ითანამშრომლოო, ვის აქვს და ვის არაო პლანი დათესილიო ან კულაშშიო ან დაფნარშიო და საჯავახოშიო. ეს მოხდა 07.08.2016 აგვისტოს, კარგად გემშვიდობებით ყველას. დემური სტურუა. 20:10. დედა დარჩი მარტო, მაგრამ რა ვქნა".

აღსანიშნავია, რომ პოლიციელმა, რომელსაც სტურუა მუქარაში ადანაშაულებდა, გამოძიების დასრულებამდე, თანამდებობა დატოვა.

სტურუას თვითმკვლელობამდე მიყვანის საქმეზე გამოძიებას დასავლეთ საქართველოს საოლქო პროკურატურის საგამოძიებო ნაწილი უკვე რამდენიმე დღეა აწარმოებს. გამოძიება სისხლის სამართლის კოდექსის 333-ე (უფლებამოსილების გადამეტება) და 115-ე (თვითმკვლელობამდე მიყვანა) მუხლებით მიმდინარეობს.