არჩევნებამდე 10 დღით ადრე თბილისის მერიის დასუფთავების სამსახურის თანამშრომლებმა "კანონდარღვევით" გაკრული საარჩევნო პლაკატებისგან ქალაქის "დასუფთავება" დაიწყეს. ოპოზიციურ პარტიები ამბობენ, რომ თანამშრომლები იმ პლაკატებსაც ხსნიან, რომელიც დასაშვებ ადგილასაა გაკრული.

გრიგოლ ვაშაძის შტაბის უფროსმა, გიორგი ვაშაძემ ბრიფინგზე განაცხადა, რომ პლაკატების გასაკრობად თვითმმართველობამ შესაბამისი სტენდები უნდა მოაწყოს. მისივე თქმით, პლაკატებს ხსნიან არა მხოლოდ ბოძებიდან, სადაც გაკვრა აკრძალულია, არამედ იქაც, სადაც გაკვრა ნებადართულია.

"რატომ აკეთებენ ამას? ბევრი ფული აქვთ, ბანერები გამოაკრეს მთელ ქალაქში და უნდათ, რომ ჩვენი ვიზუალური მასალა გააქრონ", — განაცხადა ვაშაძემ.

ამავე საკითხზე ბრიფინგი გაიმართა ევროპული საქარველოს ოფისშიც. ელენე ხოშტარიას თქმით, თბილისის მერის დავალებით დასუფთავების სამსახურის თანამშრომლები სამშენებლო ღობიდან ხსნიან დავით ბაქრაძის პლაკატებს მაშინ, როცა იქ გაკვრა ნებადართულია.

"პირდაპირ პოლიტიკური დაკვეთით მისცა დავალება, რომ მთავარი ოპონენტის, დავით ბაქრაძის პლაკატები ჩამოიხეს. კანონით დადგენილ კონკურენციასაც ვერ უძლებს ქართული ოცნება", — აღნიშნა ხოშტარიამ.

ქალაქის "დასუფთავების" განკარგულება თბილისის მერმა, კახა კალაძემ 17 ოქტომბერს გასცა. კალაძის განმარტებით, პლაკატები გაკრულია ისტორიულ ძეგლებსა და მეტროს ჩასასვლელებში და პლაკატებისთვის სპეციალური ადგილებია გამოყოფილი.