თბილისის მერი, კახა კალაძე ითხოვს, რომ ქალაქი საარჩევნო პლაკატებისგან "დაასუფთაონ". მისი თქმით, კანონმდებლობით განსაზღვრულია ადგილები, სადაც საარჩევნო პლაკატების გაკვრა არ შეიძლება.

პირდაპირ ეთერში საუბრისას მერმა გაკვრული პლაკატების ფოტოებიც აჩვენა, რომლებზეც მხოლოდ ოპოზიციური პარტიების საარჩევნო პლაკატები იყო ასახული.

კალაძის განმარტებით, პლაკატები გაკრულია ისტორიულ ძეგლებსა და მეტროს ჩასასვლელებში, რაც მიუღებელია. ქალაქის "დასუფთავება და დალაგება" მერმა თბილსერვისის ხელმძღვანელს, ლევან ჯღარკავას დაავალა.

"კატეგორიულად მიუღებელია ეს ყველაფერი, რაც ხდება. მესმის, რომ არის არჩევნები, მაგრამ არის გამოყოფილი სპეციალური ადგილები, სადაც მათ აქვთ უფლება, რომ განათავსონ საარჩევნო პლაკატები და არა ისეთ ადგილებზე, რომელიც ძვირფასი და მნიშვნელოვანია და ამახინჯებენ ამ სულელური პლაკატებით", - განაცხადა მერმა მთავრობის სხდომის დაწყების წინ.