ეკონომიკის მინისტრი გიორგი ქობულია რუსთავი 2-ის მიერ გავრცელებულ აუდიოჩანაწერებს გამოეხმაურა და აღნიშნა, რომ ქვეყანაში არსებული "პოლიტიკური კრიზის რეალურად კრიზისი არ არის". მისივე თქმით, მსგავსი "ვითომ კრიზისის" გამოსწორება ხალხის კეთილდღეობის ამაღლებით არის შესაძლებელი.

"ეს არის ყველაფერი ამოწოვილი და ეს არამარტო იმისთვის კეთდება, რომ არჩევნებია. ამის ძირითადი საფუძვლები, ფუნდამენტური პრობლემა არის ჩვენი ხალხის გასაჭირი, ხალხს უჭირს. ამიტომ, როცა ხალხს უჭირს, რა თქმა უნდა, უკმაყოფილებაა. ეს უკმაყოფილება სხვადასხვა ფორმით გამოიხატება", — განაცხადა მინისტრმა.

17 ოქტომბერს რუსთავი 2-მა, სავარაუდოდ, მირზა სუბელიანისა და დეპუტატ ვიქტორ ჯაფარიძის მონაწილეობით კიდევ ერთი აუდიოჩანაწერი გაავრცელა, რომლის ავთენტურობაც ჯერ დადასტურებული არ არის.

რუსთავი 2-ის ინფორმაციით, სავარაუდოდ, მირზა სუბელიანი სოზარ სუბარსა და კახი კახიშვილს ემუქრება. რუსთავი 2-ის ცნობით, სწორედ სოზარ საუბარია პიროვნება, რომელიც ციხეში სუბელიანს აკონტროლებდა.

"მირზა სუბელიანის ჩანაწერები"

პროკურატურისა და რუსთავი 2-ის მიერ გავრცელებული "მირზა სუბელიანის აუდიოჩანაწერები", საგამოძიებო უწყების პოზიციით სხვადასხვა დროსაა ჩაწერილი. რუსთავი 2-მა 11 ოქტომბრის, ხოლო პროკურატურამ 6 ივლისის ჩანაწერი გაასაჯაროვა. ამის მიუხედავად, აუდიოჩანაწერებში თემების ნაწილი მეორდება და ერთმანეთს უპირისპირდება კიდეც.

რუსთავი 2-ის ჩანაწერით, სუბელიანს კომპრომატები აქვს ხელისუფლების მაღალჩინოსნების წინააღმდეგ, ხოლო პროკურატურის მიერ გავრცელებული აუდიოჩანაწერით, მირზა სუბელიანი აპირებს მოიტყუოს. აუდიოჩანაწერის ავთენტურობა ჯერჯერობით დადასტურებული არ არის.

პროკურატურაში ამბობენ, რომ ფარულ აუდიოჩანაწერებზე გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.

აუდიოჩანაწერების მოსმენის შემდეგ მმართველი პარტია დადგმულ სერიალზე საუბრობდა, ოპოზიცია კი სისტემურ დანაშაულზე. სასჯელაღსრულების სამსახურში დაადასტურეს, რომ 15 ოქტომბერს მირზა სუბელიანმა თვითმკვლელობა სცადა.

გაიგეთ მეტი: მირზა სუბელიანის აუდიოჩანაწერი