რუსთავი 2-მა "მირზა სუბელიანის ციხეში ჩაწერილი ახალი ფარული აუდიოჩანაწერი" გაავრცელა. ამ ჩანაწერის გმირები ისევ მირზა სუბელიანი და ვიქტორ ჯაფარიძე არიან. ჩანაწერების ავთენტურობა დადგენილი არ არის.

რუსთავი 2-ის ინფორმაციით, სავარაუდოდ, მირზა სუბელიანი სოზარ სუბარსა და კახი კახიშვილს ემუქრება. რუსთავი 2-ის ცნობით, სწორედ სოზარ სუბარია პიროვნება, რომელიც ციხეში სუბელიანს აკონტროლებდა.

აუდიოფაილიდან იკვეთება, რომ სავარაუდოდ, მირზა სუბელიანი ემუქრებოდა და აშანტაჟებდა ხორავას ქუჩის საქმის გამო ხელისუფლებას. სავარაუდოდ, მირზა სუბელიანი დაკავებამდე შეხვდა სასჯელაღსრულების მინისტრს, კახა კახიშვილს და უთხრა, რომ ციხეში განსაკუთრებული პირობები უნდა შეექმნა, წინააღმდეგ შემთხვევაში კი აუდიოჩანაწერებს გაუვრცელებდა.

სუბელიანის თქმით, 2013 წელს კახიშვილი ფარული მიყურადების ობიექტი იყო. პროკურატურის ყოფილი მაღალჩინოსანი სასჯელაღსრულების სამინისტროსთან გამართულ აქციებს, იქ ლალი მოროშკინას მონაწილეობასა და მოროშკინასა და კახიშვილის სატელეფონო საუბარს ახსენებს.

"ეს ყველაფერი არის მიზანმიმართული, ძმაო, ესენი არიან ნაცებთან. ეს თემა თუ არ იყოს, შემაფურთხე თვალებში, რასაც ესენი აკეთებენ. ამას ესენი აკეთებენ ხელოვნურად, რომ მე ავფეთქდე, გავგიჟდე, კამერა ჩამოვიღო, ერთი-ორი კონტროლიორი ზემოდან დავაწვინო და მერე თქვან, აი, ხომ ხედავთ რა, მირზამ ვერ გაქაჩაო, ნერვებმა უმტყუნაო. აბა, რისთვის ხდება ეს. თორემ დაჭერამდე ორი დღით ადრე ავედი მინისტრთან კახიშვილთან, მე თვითონ ვიყავი და მივდივარ ძმაო და ვჯდები-მეთქი და იმედია, შენი მხრიდან პ..ბა არ იქნება მეთქი, პირში ვუთხარი, თორე შენ რასაც აკეთებდი 2013 წელში ეგ ძალიან კარგად ვიცი-მეთქი, ერთ რამეს შეგახსენებ მეთქი, შენ რომ ლალი მოროშკინას მართავდი-მეთქი და ერთხელ რომ გავიდა ზეთში მეთქი და „კახი, კახი“ და რომ ატყდა ერთი ამბავი მეთქი, შენ დაარიგე ლალი მაროშკინა, რომ შენი სახელი კი არა, კახი კალაძის სახელი იყო და ეგ აუდიოჩანაწერები ტ...ში აქვთ მეთქი. რავი, მე მგონი დრო ხომ არ არის, რაღაც რომ .. მოვახდინო, იმიტომ რომ იქ „ომეგას“ აქვს ფარული ჩანაწერები, აქ პეტრეს მიაქ ფარული ჩანაწერები, აქ თურმე შაყულაშვილი გამოვიდა და მე გამომიყვანა, თურმე ჩემი შვილი მოკლესო, ჩათვალეო".

მირზა სუბელიანი ამბობს, რომ მას მობილური ტელეფონი გაგზავნილი აქვს გერმანიაში და აპირებს ჩაატაროს ექსპერტიზა, რითაც დაამტკიცებს, რომ აქვს მიმოწერა ყოფილ პროკურორთან, მიხეილ შაყულაშვილთან.

სავარაუდოდ, მირზა სუბელიანის თქმით, ის არ დათანხმდა ხელისუფლების შეთავაზებას. ის რომ ამ შეთავაზებას დათანხმებოდა შეეძლო წასულიყო საფრანგეთში, მიეღო ორი მილიონი ლარი და ეცხოვრა. სავარაუდოდ, სუბელიანის თქმით, მას სოზარ სუბარისთვის კაცური სიტყვა აქვს მიცემული, თუმცა თუ ციხიდან არ გამოვა მზად არის მასზეც ისაუბროს.

"კადრებში მაყურყუტებდნენ, მირზა არ გავწიროთ კომპრომატები აქვსო, ერთი კაცი მითხარით ვისთანაც დამცდენია რამე", — ამბობს, სავარაუდოდ, მირზა სუბელიანი.

"მირზა სუბელიანის ჩანაწერები"

პროკურატურისა და რუსთავი 2-ის მიერ გავრცელებული "მირზა სუბელიანის აუდიოჩანაწერები", საგამოძიებო უწყების პოზიციით სხვადასხვა დროსაა ჩაწერილი. რუსთავი 2-მა 11 ოქტომბრის, ხოლო პროკურატურამ 6 ივლისის ჩანაწერი გაასაჯაროვა. ამის მიუხედავად, აუდიოჩანაწერებში თემების ნაწილი მეორდება და ერთმანეთს უპირისპირდება კიდეც.

რუსთავი 2-ის ჩანაწერით, სუბელიანს კომპრომატები აქვს ხელისუფლების მაღალჩინოსნების წინააღმდეგ, ხოლო პროკურატურის მიერ გავრცელებული აუდიოჩანაწერით, მირზა სუბელიანი აპირებს მოიტყუოს. აუდიოჩანაწერის ავთენტურობა ჯერჯერობით დადასტურებული არ არის.

პროკურატურაში ამბობენ, რომ ფარულ აუდიოჩანაწერებზე გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.

აუდიოჩანაწერების მოსმენის შემდეგ მმართველი პარტია დადგმულ სერიალზე საუბრობდა, ოპოზიცია კი სისტემურ დანაშაულზე. სასჯელაღსრულების სამსახურში დაადასტურეს, რომ 15 ოქტომბერს მირზა სუბელიანმა თვითმკვლელობა სცადა.