საერთაშორისო ორგანიზაცია საერთაშორისო გამჭვირვალობას მიაჩნია, რომ საქართველოში სახელმწიფოს მიტაცებისა და სამოქალაქო საზოგადოებაზე ზეწოლის მზარდი ნიშნებია. განცხადება ორგანიზაციის სამდივნომ გაავრცელა, რომლის ქართული თარგმანიც საერთაშორისო გამჭვირვალობა — საქართველომ გამოაქვეყნა. განცხადების მიხედვით, ორგანიზაცია შეშფოთებულია იმით, რომ ხელისუფლების წამყვანი პირები სამოქალაქო სექტორს თავს სიტყვიერად ესხმიან.

განცხადებაში წერია, რომ 2018 წლის 3 ოქტომბერს ორგანიზაციის ქართულმა წარმომადგენლობამ მოუწოდა საქართველოს მთავრობას, დაეწყო გამოძიება თამბაქოს ბიზნესის საქმეზე. კერძოდ, ორგანიზაციამ განაცხადა, რომ მედიის მიერ გავრცელებული აუდიოჩანაწერები საქართველოში თამბაქოს ბაზრის კონტროლის მიზნით შექმნილი სქემის არსებობაზე მიუთითებდა, რომლის საშუალებითაც მმართველ გუნდსა და მოსამართლეებს სარგებელი უნდა მიეღოთ. არასამთავრობო ორგანიზაცია მიიჩნევს, რომ ამას პარლამენტის თავმჯდომარე, ირაკლი კობახიძე უსაფუძვლო ბრალდებებით გამოეხმაურა:

"მას შემდეგ, რაც ჩანაწერები გავრცელდა და წამყვანმა სამოქალაქო ორგანიზაციებმა მოუწოდეს საქართველოს მთავრობას, დაეწყო გამოძიება აღნიშნულ ბრალდებებთან დაკავშირებით, ქართული ოცნების აღმასრულებელმა მდივანმა და საქართველოს პარლამენტის თავმჯდომარემ, ირაკლი კობახიძემ, სავარაუდოდ ყურადღების გადატანის მიზნით, სამოქალაქო ორგანიზაციების, მათ შორის საერთაშორისო გამჭვირვალობა - საქართველოს ხელმძღვანელებს ფაშიზმის თანამონაწილეები უწოდა."

განცხადებაში წერია, რომ მთავრობამ კორუფციის იმ შესაძლო შემთხვევების სრულფასოვანი გამოძიება უნდა უზრუნველყოს, რომლებზეც გავრცელებული აუდიოჩანაწერები მიუთითებენ.

ორგანიზაცია მიიჩნევს, რომ საერთაშორისო გამჭვირვალობა — საქართველო აპოლიტიკური მოძრაობაა და საქართველოს მთავრობამ "უსაფუძვლო ბრალდებებისგან თავი უნდა შეიკავოს". არასამთავრობოს აზრით, ამ პროცესმა არჩევნებზე დაკვირვებისას სამოქალაქო სექტორის სამუშაო პროცესი შეიძლება შეაფერხოს.