რადიო თავისუფლების თბილისის ბიუროს ჟურნალისტი ნინო ჯაფიაშვილი უხელმძღვანელებს. თანამდებობა მას შემდეგ გახდა ვაკანტური, რაც 2018 წლის 31 იანვარს ბიუროს ყოფილმა ხელმძღვანელმა, მარინა ვაშაყმაძემ თანამდებობა დატოვა.

ჯაფიაშვილის თქმით, ახალი თანამდებობა მისთვის საინტერესო შესაძლებლობების მომტანია და ეძლევა სიახლეების, ექსპერიმენტების, აუდიტორიისთვის მნიშვნელოვანი და სასარგებლო ამბების შექმნისთვის.

ვინ არის ნინო ჯაფიაშვილი

ნინო ჯაფიაშვილი ჟურნალ ინდიგოს დამფუძნებელია. მანამდე ის ჟურნალ ცხელი შოკოლადის რედაქტორი და მისი ვებგვერდის კურატორი იყო. საქართველოს ჟურნალისტური ეთიკის ქარტიის ცნობით, საერთო ჯამში მას სატელევიო, ბეჭდურ და ონლაინმედიაში მუშაობის 20-წლიანი გამოცდილება აქვს.

ჯაფიაშვილი, ასევე, იყო ინტერნიუს ნეტვორკისა და ტელეკომპანია რუსთავი 2-ის რეპორტიორი, წამყვანი და პროდიუსერი. ამასთან, ჟურნალ ლიბერალის ერთ-ერთი დამფუძნებელი და ყოფილი აღმასრულებელი რედაქტორი. მუშაობდა ამ გამოცემის ონლაინპორტალის მთავარ რედაქტორადაც.

რადიო თავისუფლების თბილისის ბიუროს ახალი ხელმძღვანელი კავკასიის ჟურნალისტიკისა და მედიამენეჯმენტის სკოლაში (GIPA) მედიაეთიკას ასწავლის. ჯაფიაშვილი ჟურნალისტური ეთიკის ქარტიის საბჭოს წევრი 2015 წლის 20 დეკემბერს გახდა.

კონფლიქტი რადიო თავისუფლების მენეჯმენტსა და თანამშრომლებს შორის

დაახლოებით 9 თვის წინ მარინა ვაშაყმაძის მიერ თანამდებობის დატოვებას რადიო თავისუფლების ქართული სამსახურის დირექტორის, დავით კაკაბაძის გათავისუფლება უძღოდა წინ. მარინა ვაშაყმაძემ სამსახურიდან წასვლის შემდეგ განაცხადა, რომ ის ღირებულებებისა და სტანდარტების უგულებელყოფას ვერ შეეგუებოდა და თანამდებობაც სწორედ ამიტომ დატოვა. დავით კაკაბაძის თქმით კი, ახალი ხელმძღვანელობა, პირველ რიგში, რეიტინგს აქცევდა ყურადღებას და ქართული სამსახურის რუსთავი 2-თან თანამშრომლობის მომხრე იყო.