რადიო თავისუფლების თბილისის ბიუროს ხელმძღვანელმა, მარინა ვაშაყმაძემ თანამდებობა გუშინ დატოვა. როგორც მან On.ge-ს უთხრა, ის ღირებულებებისა და სტანდარტების უგულებელყოფას ვერ შეეგუება:

"დეტალებს აღარ აქვს მნიშვნელობა ასეთ ვითარებაში. არაფერი შეიძლება იყოს ამ ღირებულებების დაცვაზე უფრო მნიშვნელოვანი. რადიო თავისუფლების ერთ-ერთ ხელმძღვანელად ყოფნა ძალიან დიდი პატივი იყო ჩემთვის. თუმცა გაცილებით დიდი პატივია რადიო თავისუფლების გუნდთან ერთად მუშაობა, საქმისათვის თავდადებულ, ჟურნალისტური სტანდარტების ერთგულ პროფესიონალებთან საქართველოში, თუ მის ფარგლებს გარეთ".

რადიო თავისუფლების (RFE/RL) ქართული სამსახურის დირექტორი დავით კაკაბაძე სამსახურიდან რამდენიმე დღის წინ გაათავისუფლეს. როგორც კაკაბაძემ On.ge-ს უთხრა, ხელმძღვანელების გადაწყვეტილება მისთვის მოულოდნელი არ ყოფილა:

"როცა ერთხელ ხდება კონფლიქტი, უფროსობასა და შენს შორის უთანხმოებები წარმოიშობა, მერე უფრო ადვილია, ყოველ წვრილმანზე შეიძლება მოგედაონ და ასეთი რაღაცები ხდებოდა. სამწუხაროდ, ისეთი სიტუაცია შეიქმნა, რომ ამ კონკრეტულ ხალხს, ვინც ახლა რადიოს ხელმძღვანელია, არ უყვარს, როცა ეკამათებიან, არ ეთანხმებიან".

RFE/RL-ის სათაო ოფისის მენეჯმენტსა და ქართული სამსახურის ხელმძღვანელს დავით კაკაბაძეს შორის უთანხმოების შესახებ რამდენიმე დღის წინ, 23 იანვარს გახდა ცნობილი. ქართული ბიურის თქმით, სათაო ოფისის მენეჯმენტი რუსთავი 2-თან თანამშრომლობას აიძულებს, რისი წინააღმდეგიც არიან. 25 იანვარს, რადიოს ქართულმა ბიურომ განაცხადა, რომ უთანხმოების გადაჭრის გზად მენეჯმენტმა კაკაბაძის გათავისუფლება დაისახა, რასაც მოჰყვა რედაქციის სრული შემადგენლობის წერილობითი პროტესტი რთე/რთ-ის პრეზიდენტის, ტომ კენტის სახელზე.