საქართველოს ყოფილი პრემიერი, ვანო მერაბიშვილი უკვე მეექვსე წელი დაიწყო, რაც ციხეშია. ამ დრომდე არ გამხდარა ცნობილი ნაციონალური მოძრაობის დაშლის შემდეგ ვის უჭერს ის მხარს, დარჩენილ ნაწილს თუ გამოყოფილ ევროპულ საქართველოს. რუსთავი 2-თან ინტერვიუში მერაბიშვილმა თქვა, რომ ორივე პარტიის წევრები თანამებრძოლებლად მიაჩნია და არჩევანზე არ უფიქრია.

მერაბიშვილის თქმით, ყველაფერს გააკეთებს იმისთვის, რომ ეს ძალები გაერთიანდნენ. იმის გასარკვევად თუ რას ფიქრობენ პარტიები მერაბიშვილის განცხადებაზე On.ge ნაციონალურ მოძრაობასა და ევროპულ საქართველოს დაუკავშირდა.

ნაციონალური მოძრაობის წევრი, რომან გოცირიძე აცხადებს, რომ პარტია ახლა საპრეზიდენტო არჩევნებისთვის ემზადება და სხვა ნებისმიერი სახის გაერთიანებაზე საუბარი რეალურ კონტექსტს მოკლებული იქნება.

"ამ ეტაპზე ჩვენი ერთადერთი ამოცანა არის საპრეზიდენტო არჩევნებში გამარჯვება და ჩვენი კანდიდატის ირგვლივ ყველა ოპოზიციური პარტიის გაერთიანება, მიუხედავად მათი იდეოლოგიური მიმართულებისა", — აცხადებს გოცირიძე.

ევროპული საქართველოს წევრი, სერგო რატიანი კი ამბობს, რომ ნაადრევია იმაზე საუბარი თუ რა იქნება მომავალში. მისი თქმით, მერაბიშვილის განწყობა გასაგებია, თუმცა პარტია ორად გაიყო და "წასვლა-წამოსვლაზე" საუბარი არ არის.

"ვანო არის ადამიანი, რომელიც იბრძოდა და მართლაც შესწირა ყველაფერი ნაციონალურ მოძრაობას. მისი მეგობრები არიან ერთგანაც და მეორეგანაც. ბუნებრივია მისი განწყობა, რომ მას აქვს სურვილი გაერთიანების", — განაცხადა რატიანმა. მისივე თქმით, ევროპული საქართველოს წევრებს ამ საკითხზე მერაბიშვილთან აქამდეც უსაუბრიათ.

რუსთავი 2-თან ინტერვიუში მერაბიშვილმა განაცხადა, რომ ბოლომდე ვერ იაზრებს პარტიის ორად გაყოფის ფაქტს.

"მე ჯერაც ისევ ვუყურებ, რომ ამ ორმა ძალამ რაღაც ეტაპზე მაინც უნდა ნახოს საერთო ენა და საერთო ინტერესებისთვის იბრძოლოს", — განაცხადა მერაბიშვილმა.

რუსთავი 2-თან რამდენიმეწუთიან ინტერვიუში მერაბიშვილმა ყურადღება გაამახვილა მის შესაძლო მოწამვლაზე, ნაციონალური მოძრაობის დაშლაზე, მის მიმართ ხელისუფლების ანგარიშსწორების ფორმასა და პრეზიდენტის შეწყალებაზე.

გაიგეთ მეტი: