კანადელი მუსიკოსი მაიკლ ბუბლეი 16 ნოემბერს თავის ფინალურ ალბომს გამოუშვებს და შემდეგ მუსიკალურ კარიერას შეწყვეტს.

4 გრემის მფლობელი მომღერლის გადაწყვეტილებას წინ სდევდა 2016 წელს მისი მცირეწლოვანი შვილის სიმსივნის დიაგნოზი, რის გამოც, მაიკლის სიტყვებით, ვეღარასდროს შეძლებს საჯარო ცხოვრების გაგრძელებას. ბუბლეის თქმით, ის სოციალურ მედიასაც აღარ გამოიყენებს.

დეილი მეილთან ემოციურ ინტერვიუში მუსიკოსი იხსენებს, როგორი ტრაგიკული იყო მისთვის შვილის დიაგნოზის მოსმენა და ამბობს, რომ მთელი ყურადღების გადატანა ოჯახის წევრებზე სურს:

"ჩემი შინაგანი სამყარო და ცხოვრების მიმართ დამოკიდებულება მთლიანად შეიცვალა. წარსულში, საჯაროდ ემოციების კონტროლი არასდროს მიჭირდა, ახლა კი, არც კი ვიცი, ამ საუბარს ტირილის გარეშე თუ დავასრულებ".

ბუბლეის 5 წლის შვილის, ნოას, სიმსივნე ახლა რემისიის ფაზაშია, თუმცა მუსიკოსის თქმით, პოპულარობასთან თანმდევ წნეხსა და შფოთვას ვეღარ გაუძლებს, რის გამოც კარიერის შეწყვეტა გადაწყვიტა:

"უბრალოდ აღარ შემიძლია ცნობილ ადამიანისთვის თანმდევი ნარცისიზმის ატანა. ეს ჩემი ბოლო ინტერვიუა, მე მივდივარ. საუცხოო ჩანაწერებს ვტოვებ და ამ გადაწყვეტილებისთვის საუკეთესო დროა".

ბუბლეიმ მძიმე გამოცდილების შესახებ 4 ოქტომბერს, The Today Show-სთანაც ისაუბრა:

"ეს ყველაზე ცუდი რამაა, რაც შესაძლოა მშობელმა მოისმინოს. იყო დღეები, როცა ჩვენ [ბუბლეის ცოლი ცნობილი არგენტინელი მსახიობი ლუისიანა ლოპილატოა] გაღვიძებაც კი არ გვინდოდა".

მაიკ ბუბლეის ბოლო, მეათე ალბომს Love ჰქვია. ალბომიდან ორი სიმღერა და კლიპი, Love You Anymore და When I Fall In Love უკვე გამოსულია.