გირჩის საპრეზიდენტო კანდიდატი ზურა ჯაფარიძე ქართუ ბანკისგან მილიონი ლარის ოდენობის სესხი მოითხოვა. ამის შესახებ გირჩმა 10 ოქტომბერს გაავრცელა ინფორმაცია.

ქართუ ბანკისგან იმავე ოდენობის სესხი ქართული ოცნების მიერ მხარდაჭერილმა კანდიდატმა, სალომე ზურაბიშვილმა მიიღო.

როგორც ჯაფარიძე განმარტავს, ზურაბიშვილის მსგავსად სესხი მასაც ეკუთვნის. მისივე თქმით, ბანკი მის თხოვნას განიხილავს.

"ზურაბიშვილი კანდიდატი არის, კანდიდატი ვარ, არჩევნებში იღებს მონაწილეობას, არჩევნებში ვიღებ მონაწილეობას. მილიონი მისცეს, მილიონი მომცენ".

საქართველოს საარჩევნო კოდექსის 56-ე მუხლის თანახმად, თუ პრეზიდენტობის კანდიდატი არჩევნებზე ხმების 10 პროცენტს ან მეტს დააგროვებს, მას ეკუთვნის მილიონი ლარი წინასაარჩევნო ხარჯების დასაფარად.

უკვე ცნობილია, რომ აუდიტის სამსახური სალომე ზურაბიშვილის მიერ ქართუ ბანკიდან მილიონლარიანი სესხის აღებას შეისწავლის.

როგორც პრესსამსახურმა On.ge-ს განუმარტა, უწყება შეისწავლის თუ რა პროცენტში აქვს ზურაბიშვილს სესხი აღებული და შეადარებენ მას სხვა კომერციული ბანკების სესხის პროცენტს. თუ სესხის საპროცენტო განაკვეთი სხვა ბანკებთან შედარებით გაცილებით დაბალია ის შეიძლება, ჩაითვალოს შემოწირულობად, რომელიც დაფიქსირებული არ არის.