გაერთიანებული ოპოზიციის საპრეზიდენტო კანდიდატის, გრიგოლ ვაშაძის თქმით, კანაფის კულტივაციის კანონპროექტი ორი თვით გადავადების ნაცვლად, ხელისუფლებას საერთოდ უნდა გაეწვია. პრეზიდენტობის კანდიდატის შეფასებით, კანონპროექტი "დანაშაულებრივია".

ვაშაძე ამბობს, რომ კანონპროექტის მიზანი "მომავალი თაობების ამოწყვეტის ხარჯზე" ქართული ოცნების გამდიდრებაა.

"თქვენ უკვე ახდენთ დაბოლილების შთაბეჭდილებას და მინდა გითხრათ, რომ კატეგორიულად არ დავუშვებთ, რომ ეს მოუვიდეს მთელ საზოგადოებას", — ასე მიმართა ვაშაძემ ხელისუფლებას.

ვაშაძის თქმით, საპრეზიდენტო არჩევნებში გამარჯვების შემდეგ ვეტოს ან მშვიდობიანი დემონსტრაციების გზით დაუპირისპირდება აღნიშნულ კანონპროექტს.

მას შემდეგ, რაც ცნობილი გახდა, რომ შინაგან საქმეთა სამინისტრო მარიხუანის კულტივაციის კანონპროექტზე მუშაობდა ვაშაძემ ეს ინიციატივა გააკრიტიკა. მიხეილ სააკაშვილისა და მეუფე იაკობის განცხადებების შემდეგ ვაშაძემ აღნიშნა, რომ მარიხუანის კულტივაციამ ეკონომიკურად განვითარებული კოლუმბია გაანადგურა და საქართველოსთვისაც საფრთხისშემცველია.

რაც შეეხება მარიხუანის მოხმარების ლეგალიზაციას, ვაშაძემ მოხმარება პედოფილიას შეადარა. მოგვიანებით კი აღნიშნა, რომ ეს ემოციურ ფონზე განაცხადა და დასძინა, რომ კანონპროექტი ახალგაზრდობის გასანადგურებლად და ამომრჩევლის გასათიშად არის მოგონილი.