არასამთავრობო ორგანიზაცია სამართლიანი არჩევნების განცხადებით, ჭყონდიდის მიტროპოლიტმა, მეუფე პეტრე პაავამ ქადაგების დროს საქართველოს პრეზიდენტობის კანდიდატის, სალომე ზურაბიშვილის საწინააღმდეგო აგიტაციის ნიშნების შემცველი, პოლიტიკური მოწოდებები გაავრცელა.

მიტროპოლიტ პეტრეს თქმით, "...დაფრანგული ქალბატონი თავისი დაფრანგული აზროვნებით ვერ მოგვიტანს კეთილდღეობას და დარწმუნებული ვარ, რომ ღმერთი არ დაუშვებს რომ ღმერთი გაუწყრეს ქართველ მოსახლეობას, ქართველ ამომრჩეველს და ქართველ ერს, რომ გააკეთოს არასწორი არჩევანი".

სამართლიანი არჩევნების ცნობით, პრეზიდენტობის კანდიდატის შესახებ მოსაზრებების ამ ფორმით გამოხატვით დაირღვა წინასაარჩევნო კამპანიაში მონაწილეობის კანონით დადგენილი წესი. საქართველოს საარჩევნო კოდექსის 45-ე მუხლის მე-4 პუნქტის ზ ქვეპუნქტის თანახმად, რელიგიურ ორგანიზაციებს წინასაარჩევნო აგიტაციის გაწევისა და აგიტაციაში მონაწილეობა ეკრძალებათ.

"საქართველოს სახელმწიფოსა და საქართველოს სამოციქულო ავტოკეფალურ მართლმადიდებელ ეკლესიას შორის დადებული კონსტიტუციური შეთანხმების თანახმად ეკლესიას სპეციალური უფლებამოსილების გარეშე წარმოადგენს წმინდა სინოდიც. შესაბამისად, მიტროპოლიტის მიერ მისი სტატუსისა და უფლებამოსილების ფარგლებში გაკეთებული საჯარო გამოხატვა უნდა გაღიმებოდეს რელიგიური ორგანიზაციის პოზიციად, რადგან ის წმინდა სინოდს წარმოადგენს", — ნათქვამია მონიტორინგის ანგარიშში.

ანგარიშის მიხედვით, რელიგიური ორგანიზაციების ლიდერების საჯარო გამოსვლა ნებისმიერი ფორმით, მათ შორის ქადაგება, თავის თავში მოიცავს ამომრჩეველთან კომუნიკაციის კომპონენტს და წარმოადგენს საჯარო მოქმედებას, მით უფრო როდესაც ის ფართოდ შუქდება მედია საშუალებების მიერ.

ზუგდიდისა და ცაიშის მიტროპოლიტლმა მეუფე პეტრემ 17 სექტემბერს ქადაგებისას მმართველი პარტიის მიერ მხარდაჭერილი საპრეზიდენტო კანდიდატის, სალომე ზურაბიშვილის განცხადებები შეაფასა. მისი თქმით, ბოროტება და ქვეყნის მტრობაა იმის თქმა, რომ საქართველომ ომი დაიწყო.

ამ განცხადებების შემდეგ, მართლმადიდებელი ეკლესიის პატრიარქმა, ილია მეორემ მოუწოდა მღვდლებს თავი შეეკავებინათ პოლიტიკოსების არაკორექტულად შეფასებისაგან.

თავდაპირველად ზურაბიშვილმა განაცხადა, რომ თავს უფლებას არ მისცემდა მეუფეების განცხადებები შეეფასებინა. მოგვიანებით კი აღნიშნა — "ეკლესიის ამ დონის ფიგურები ერევიან იმაში, რაც ნამდვილად არ არის მათი საქმე".