საპატრიარქოს ვებგვერდზე მართლმადიდებელი ეკლესიის კათოლიკოს-პატრიარქის, ილია მეორის მიმართვა გავრცელდა, სადაც ის მღვდელმთავრებსა და სხვა სასულიერო პირებს, პოლიტიკური შინაარსის არაკორექტურლი განცხადებებისაგან თავის შეკავებისკენ მოუწოდებს:

"სამწუხაროდ, არჩევნების მოახლოებასთან ერთად ზოგიერთი მღვდელმსახური აკეთებს პოლიტიკური შინაარსის განცხადებებს და, ამასთან, საჯარო სივრცეში არაკორექტულად მოიხსენიებს ამა თუ იმ პოლიტიკურ პირს... შევახსენებთ, რომ ეკლესია ყოველთვის იყო და იქნება პოლიტიკურად ნეიტრალური ერის გამაერთიანებელი ძალა და ჩრდილს ნუ აყენებენ მას და საკუთარ თავს".

17 სექტემბერს, ჭყონდიდის მიტროპოლიტმა პეტრემ პრეზიდენტობის კანდიდატი სალომე ზურაბიშვილი შეაფასა. მან აგვისტოს ომის შესახებ ზურაბიშვილის განცხადებებზე ისაუბრა:

"დიდი ბოროტებაა იმის თქმა, რომ საქართველოს ტერიტორიაზე საქართველომ დაიწყო ომი. რა თქმა უნდა, ეს არის ან უმეცრება, საქართველოს ეკლესიისა და ისტორიისა, ან არის ეს შეგნებული ბოროტება.

მე მიმაჩნია და ვფიქრობ და მინდა ვირწმუნო, რომ როგორც თვით საფრანგეთში კრემლის მიერ მხარდაჭერილ საპრეზიდენტო ქალბატონს, ქალს არ დაუჭირა ფრანგმა ხალხმა მხარი და უთხრა მას უარი. ასევე ქართველი ერიც იტყვის უარს საქართველოს წინააღმდეგ ჩაფიქრებულ ბოროტებაზე".