მმართველი პარტიის მიერ მხარდაჭერილი პრეზიდენტობის კანდიდატის, სალომე ზურაბიშვილის განცხადებით, ოქტომბრის პირველ სამ დღეში მილიონზე მეტი შემოწირულობის მიღება გასაკვირი არაა. ზურაბიშვილის თქმით, ის მზად არის დაფინანსება ყველასგან მიიღოს.

"მე ყველას ვთხოვე დახმარება საჯაროდ, ტელევიზიით და ყველა ფორმით, რაც შემეძლო", - აცხადებს პრეზიდენტობის კანდიდატი ჟურნალისტებთან საუბრისას.

კითხვაზე, გრძნობს თუ არა ვალდებულებას იმ ადამიანების მიმართ, ვინც თანხები გადაურიცხა, სალომე ზურაბიშვილი პასუხობს, რომ არა.

"არასდროს არ ვგრძნობდი თავს ვალდებულად. ძალიან მადლობელი ვარ და არა ვალდებული", - განაცხადა სალომე ზურაბიშვილმა.

მმართველი გუნდის მიერ მხარდაჭერილმა კანდიდატმა ოქტომბრის თვის პირველ სამ დღეში მილიონ ლარზე მეტი შემოწირულობა მიიღო. შემომწირველებს შორის იყვნენ თბილისის მერი, კახა კალაძე, ქართული ოცნების დამფუძნებლის ბიძინა ივანიშვილის ძმა, ალექსანდრე ივანიშვილი და ასევე კლინიკების, ჩაჩავასა და ღუდუშაურის ექიმები.