ცენტრალურმა საარჩევნო კომისიამ ლადო ბედუკაძის პარტია - ცენტრისტები რეგისტრაციიდან მოხსნა. ამის შესახებ ცესკოს თავმჯდომარემ, თამარ ჟვანიამ, დღეს გამართულ საგანგებო ბრიფინგზე განაცხადა:

“გადაწყვეტილებები, რომელიც იმ პოლიტიკური გაერთიანებების სამართლებრივ უფლება-მოსილებებს ეხება, რომლებიც, როგორც იუსტიციის სამინისტროშია რეგისტრირებული, ასევე ამ რეგისტრაციის საფუძველზე ტარდებიან საარჩევნო ადმინისტრაციაში, მნიშვნელოვანია, რომ ასეთი ინფორმაცია შესაბამისი უწყებების მხრიდან დროულად და ოფიციალურად იქნეს მოწოდებული. დღეის მდგომარეობით ჩვენთვის უკვე ცნობილია, რომ პოლიტიკური გაერთიანება ცენტრისტების ხელმძღვანელი პირის უფლება-მოსილებას არ გააჩნია იურიდიული ძალა, შესაბამისად დღეს 11 საათზე მე მოვაწერე განკარგულებას ხელი, ეს გახლავთ ცესკოს თავმჯდომარის განკარგულება პოლიტიკური გაერთიანება ცენტრისტების რეგისტრაციის განკარგულების ბათილად ცნობის შესახებ“.

ცენტრისტების რეგისტრაციიდან მოხსნის მოთხოვნით 15 აგვისტოს განცხადება მთავრობის, ოპოზიციის და არასამთავრობო ორგანიზაციების წარმომადგენლებმა გაავრცელეს. აღნიშნული პარტიის რეგისტრაციის საკითხი განხილვის საგანი მას შემდეგ გახდა, რაც საზოგადოებრივ მაუწყებელზე მისი წინასაარჩევნო სარეკლამო რგოლი გავიდა. კლიპში ბედუკაძის პარტია ამომრჩევლებს რუსულ პენსიებს, ორმაგ მოქალაქეობასა და ქვეყანაში რუსული ბაზების შემოყვანას სთავაზობდა.