საზოგადოებრივი მაუწყებლის ეთერში გასულ, პოლიტიკური მოძრაობა ცენტრისტების წინასაარჩევნო რგოლს გამოხმაურება მთავრობაში, ოპოზიციაში და არასამთავრობო ორგანიზაციებში მოყვა.

ქართული ოცნება პოლიტიკური მოძრაობა ცენტრისტების რეგისტრაციიდან მოხსნისთვის საჭირო საკონსტიტუციო სარჩელს ამზადებს. პარტიამ ხელმოწერების შეგროვება დაიწყო, სარჩელის წარსადგენად მმართველმა გუნდმა დეპუტატთა 1/5 -ის თანხმობა უნდა მოიპოვოს.

ქართული ოცნება-დემოკრატიული საქართველოსთვის საბჭოს წევრის, სოფო კილაძის შეფასებით, ცენტრისტების კლიპი პირდაპირ ეწინააღმდეგება ქართულ სახელმწიფოებრიობას და არის ანტიკონსტიტუციური:

"სწორედ ამიტომ, ჩვენმა პოლიტიკურმა ძალამ დაიწყო სარჩელის მომზადება. ეს სარჩელი ეხება იმას, რომ საკონსტიტუციო სასამართლოს მიერ შეუჩერდეს რეგისტრაცია ამ პოლიტიკურ პარტიას, რათა მან ვერ გააგრძელოს ასეთი ანტიკონსტიტუციური ქმედებები.

ჩვენ ძალიან დიდი იმედი გვაქვს, რომ პირველ რიგში საკონსტიტუციო სასამართლო გაიზიარებს ამ სასარჩელო მოთხოვნას და ამასთანავე სხვა პოლიტიკური ძალებიც შეუერთდებიან ჩვენ ამ ინიციატივას".

საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი აცხადებს, რომ ქართული ოცნება იყენებს კონსტიტუციით მინიჭებულ უფლებას და შეიტანს სარჩელს საკონსტიტუციო სასამართლოში, იმ იმედით რომ სასამართლოს ექნება ადეკვატური გადაწყვეტილება.

შეგახსენებთ, რომ აღნიშნულ საკითხთან დაკავშირებით განცხადება გაავრცელა პრემიერმინისტრმაც და აღნიშნა, რომ ანტისახელმწიფოებრიობის წინააღმდეგ ყველანაირ ბერკეტს გამოიყენებს.

ნაციონალური მოძრაობა ფრაქციის სახელით აპირებს მიმართოს საკონსტიტუციო სასამართლოს. პარტია ხელისუფლების წარმომადგენლების შეფასებას ცინიკურს უწოდებს, ვინაიდან მიიჩნევს, რომ სწორედ ამ ხელისუფლების დროს შეეწყო ხელი პრორუსული ძალების გააქტიურებას.

აღნიშნულის შესახებ დღეს გამართულ ბრიფინგზე სერგი კაპანაძემ ისაუბრა:

„ცენტრისტების რეკლამა, რომელიც საზოგადოებრივ მაუწყებელზე გავიდა, საქართველოს ტერიტორიული მთლიანობის უსაფრთხოების წინააღმდეგაა მიმართული, რომელიც საქართველოში რუსეთის პროპაგანდის გავრცელებას ხელს უწყობს და საქართველოს მოსახლეობას სერიოზულად აზიანებს. ჩვენ ვეთანხმებით სამოქალაქო საზოგადოებას, რომ ეს პოლიტიკური გაერთიანება და ის შინაარსი, რომელსაც კლიპი მოიცავდა, ანტიკონსტიტუციურია. ამიტომ, ენმ, უახლოეს მომავალში, საპარლამენტო უმცირესობის ფარგლებში, 30 დეპუტატის მეშვეობით, მიმართავს საკონსტიტუციო სასამართლოს, რომ ეს პოლიტიკური მოძრაობა არაკონსტიტუციურად გამოცხადდეს".

სარჩელს ამზადებს და აღნიშნულთან დაკავშირებით განცხადებას ავრცელებს რესპუბლიკური პარტია.

"პირველ რიგში მინდა ვთქვა, რომ დღეს უკვე ის გაცდა კანონით დაწესებულ გამოხატვის თავისუფლების ფარგლებს და სწორედ ამიტომ, რესპუბლიკელებმა გადავწყვიტეთ, რომ სარჩელი დაგვეწერა და მოგვემზადებინა ასეთი პოლიტიკური გაერთიანების საქმიანობის აკრძალვასთან დაკავშირებით. თქვენ კარგად იცით, რომ გამოხატვის თავისუფლებას აქვს ფარგლები და ეს სწორედ ის შემთხვევაა, როცა ეს ფარგლები დაირღვა" - აცხადებს თამარ კორძაია.

აღნიშნულ საკითხს ეხმაურებიან სხვა პოლიტიკური პარტიებიც.

პარტია თავისუფალი დემოკრატების წევრი ვიქტორ დოლიძე მიიჩნევს, რომ სარეკლამო რგოლი არის ანტისახელმწიფოებრივი დანაშაულებრივი ქმედება მას არაფერი არ აქვს საერთო წინასაარჩევნო კამპანიასთან. "ჩემი აზრით და იგი არ არის მხოლოდ ერთგვარი მოსყიდვა ამომრჩევლის, ყველა წინ უნდა აღვუდგეთ იმ თემას , რომელსაც რუსული პოლიტიკის გატარება ჰქვია საქართველოში."

პარლამენტის ფრაქცია ეროვნული ფორუმის წევრი ანი მიროტაძე ფრაქციის სახელით მზადყოფნას გამოთქვამს ცენტრისტების პარტიის გაუქმებისთვის საჭირო პროცედურების მხარდასაჭერად:

"ყველა ასეთი ძალა ჩვენთვის არის მიუღებელი და ყველა იმ ინიციატივას, რომელიც დაკავშირებული იქნება ასეთი ტიპის პროპაგანდის აღკვეთასთან, ჩვენ მხარს დავუჭერთ."

პოლიტიკური პარტიების გარდა ცენტრისტების საარჩევნო რეკლამას აქტიურად განიხილავენ არასამთავრობო ორგანიზაციებიც.

დღესვე, არასამთავრობო ორგანიზაცია სამართლიანი არჩევნები, საქალაქო სასამართლოს გადაწყვეტილებას გაასაჩივრებს და აპირებს მიმართოს სააპელაციო სასამართლოს. ორგანიზაცია აქამდეც მოითხოვდა ბედუკაძის პარტიის მოხსნას ცენტრალურ საარჩევნო კომისიაში.

სამართლიანი არჩევნებისა და დემოკრატიის საერთაშორიო საზოგადოების აღმასრულებელი დირექტორი მიხეილ ბენიძემ განაცხადა, რომ სარჩელს სააპელაციო სასამართლოში დღესვე შეიტანენ.

ამავდროულად ცენტრისტების სარეკლამო რგოლზე კომუნიკაციების მარეგულირებელი კომისია მსჯელობს.

საქართველო კომუნიკაციების ეროვნული კომისიის საზოგადოებასთან სამსახურის უფროსი ხატია ყურაშვილის თქმით, რომ საზ. მაუწყებლის ეთერში პარტია ცენტრისტების წინა საარჩევნო სარეკლამო რგოლთან დაკავშირებით კომისია იმსჯელებს და დღის განმავლობაში გააკეთებს განცხადებას.

პარალელურად გრძელდება ხელმოწერების შეგროვება პეტიციაზე, რომელიც პარლამენტს და პრეზიდენტს მოუწოდებს ცენტრისტების გაუქმების მოთხოვნით.

ცენტრისტების დამფუძნებელი ბედუკაძე კი აცხადებს, რომ მისთვის არასამთავრობოების აზრი მეათეხარისხოვანია და მხოლოდ ბიძინა ივანიშვილისა და პატრიარქის აზრს გაიზიარებს.