დღეს გამართულ მთავრობის სხდომაზე პრემიერმინისტრმა, გიორგი კვირიკაშვილმა განაცხადა, რომ თბილისსა და ქობულეთში პროგრამის ფარგლებში - აწარმოე საქართველოში 2 ახალი საწარმო აშენდება.

პრემიერიმინისტრის განმარტებით, 3 755 202 ლარის ინვესტიციით თბილისში ხორცპროდუქტების საწარმო შეიქმნება, რომელიც 190 ადამიანს დაასაქმებს. ხოლო მეორე - მაკარონის, პურ-ცომეულისა და საკონდიტრო ნაწარმის გამომშვები საწარმო ქობულეთში, დაბა ოჩხამურში შეიქმნება, სადაც 160 ადამიანის დასაქმება და 320 000 ლარის ინვესტიციაა გათვალისწინებული.

გარდა ამისა, ახალი საწარმოების შექმნის მიზნით, დღესვე მთავრობა მიიღებს გადაწყვეტილებას, კომპანიებისთვის სახელმწიფო საკუთრებაში არსებული მიწის ნაკვეთის გადაცემის შესახებ.

ამათან, კვირიკაშვილის თქმით, კახეთის გზატკეცილზე ორი წლის ვადაში ყავის გადამამუშავებელი საწარმო უნდა შეიქმნას, რისთვისაც კომპანია 11 277 000 ლარის ინვესტიციას განახორციელებს და 30 ადამიანს დაასაქმებს. ხოლო ოზურგეთში, სოფელ გურიანთაში, ჩაის გადამამუშავებელი საწარმო აშენდება, რისთვისაც, მეწარმეს 57 000 კვ.მ. მიწის ნაკვეთი სახელმწიფოსგან 25-წლიანი იჯარით გადაეცემა.

პრემიერმა ასევე აღნიშნა, რომ ეს დამატებითი პროექტებია და პროგრამის ფარგლებში აწარმოე საქართველოში არ განიხილება.