სამშენებლო კომპანია შპს არქის მფლობელმა და დირექტორმა ირაკლი ქაფიანიძემ, შპს არქი ვარკეთილის მეწილემ და დირექტორმა დიმიტრი ადამიამ და შპს არქი გლდანის მეწილემ და დირექტორმა კახაბერ კობაივანოვმა ხელისუფლების მხარდაჭერილ საპრეზიდენტო კანდიდატს სალომე ზურაბიშვილს ჯამში 180 000 ლარი გადაურიცხეს. თითოეულმა პირმა საპრეზიდენტო კანდიდატს 60 000 ლარი შესწირა. მიმდინარე წლის სექტემბრის მონაცემები აუდიტის სამსახურმა გაასაჯაროვა.

შპს არქის დირექტორი წლების განმავლობაში ქართული ოცნების წევრი, ივლიანე წულაია იყო. ის ამ დრომდე რჩება არქის მფლობელის ბიზნესპარტნიორად.

სექტემბერში სალომე ზურაბიშვილს 50 000 ლარი შეწირა კოკა-კოლას დირექტორმა და ლაღიძის წყლის მეწილემ ვახტანგ ლაღიძემაც. მას შემდეგ, რაც აღნიშნული ინფორმაცია საჯარო გახდა, მომხმარებლების ნაწილმა კოკა-კოლისა და ლაღიძის წყლის ფეისბუქგვერდებზე ფლეშმობი დაიწყო. ფეისბუქგვერდებზე კომენტარებსა და შეფასებებში იდენტური შინაარსის ტექსტები: "რუსეთის გეგმის დამფინანსებელი! #რუსეთიოკუპანტია #არაოკუპაციას #Russiaisoccupant #Russiaisoccupier" იწერებოდა.

სექტემბერში საპრეზიდენტო არჩევნებში მონაწილე სუბიექტებმა ჯამში 930 012 ლარის მოცულობის შემოსავალი მიიღეს. შემოსავლების მიხედვით ნაციონალური მოძრაობა 442 691 ლარით ლიდერობდა, მეორე ადგილზე კი სალომე ზურაბიშვილი იყო 332 245 ლარით.

ამავე თემაზე: