თბილისის მერია ტაქსის თეთრად შესაღებად ვაუჩერებს გასცემს. როგორც მერმა, კახა კალაძემ მთავრობის სხდომაზე განაცხადა, ვაუჩერის მისაღებად მძღოლებმა შემდეგი პირობები უნდა დააკმაყოფილონ:

  • ლიცენზია უნდა ჰქონდეთ გავლილი 10 ოქტომბრის ჩათვლით;
  • ავტომანქანას უნდა ჰქონდეს გავლილი ტექდათვალიერება;
  • ავტომანქანა უნდა იყოს ოთხკარიანი და მარცხენასაჭიანი.

მერმა, ასევე, დაამატა, რომ ამავე კრიტერიუმების მქონე ავტომანქანებს სალონის ქიმწმენდის ვაუჩერები გადაეცემათ. კალაძემ აღნიშნა, რომ ვაუჩერებისთვის არც მძღოლები და არც მერია თანხებს არ გაიღებენ:

"მინდა გითხრათ, რომ აღნიშნულ ვაუჩერებს ტაქსების მძღოლებს გადასცემს მერიის კონკურსში გამარჯვებული კომპანია, რომელიც ტაქსებზე ორი წლით რეკლამის განთავსების სანაცვლოდ დააფინანსებს ტაქსების გადაღებვის სამუშაოებსა და ქიმიურ წმენდა ჩაატარებს".

თბილისის მერიის ახალი რეგულაციით, 2019 წლის პირველი ოქტომბრიდან ქალაქში თეთრი ფერის ტაქსები იმოძრავებენ. მიმდინარე წლის პირველი ოქტომბრიდან უკვე აიკრძალა ულიცენზიო ტაქსის მოძრაობა. გარდა ამისა, ტაქსის მომსახურებას ვეღარ გაუწევენ სამკარიანია და მარჯვენასაჭიანი ავტომობილები.

კახა კალაძემ აღნიშნა, რომ პირველი ოქტომბრის მდგომარეობით უკვე გაცემულია 12 ათასამდე ნებართვა. მისივე თქმით, ლიცენზიის მქონე მძღოლებისთვის უფასო ავტოსადგომისთვის შერჩეულია 60 ლოკაცია, ჯამში 250-მდე ტაქსის სადგომით.