პარლამენტარი მამუკა ჩიქოვანი ევროპულ საქართველოს ტოვებს. ამის შესახებ დეპუტატმა რუსთავი 2-თან საუბრისას განაცხადა.

მისი თქმით, პარტიის დატოვების შესახებ ყოფილ თანაგუნდელებს ესაუბრა. ის იმედოვნებს, რომ ისინიც წავლენ დათმობაზე, რადგან "მხოლოდ ერთობით არის შესაძლებელი "დიდი ცვლილებების განხორციელება".

"ახლა ქვეყანა არის ძალიან ღრმა კრიზისში. საზოგადოებრივი დაკვეთა არის ცვლილებები და ეს დაკვეთა აუცილებლად უნდა შესრულდეს. ჩემი ამ გადაწყვეტილებით თანამებრძოლების ინსპირირებას შევეცდები. როგორც უკვე აღვნიშნეთ, ძალიან სახიფათო ზღვარზე ვდგავართ, ქვეყანაში შექმნილია მძიმე სიტუაცია. მოახლოებული არჩევნების წინ, ეს არ არის ჩვეულებრივი არჩევნები, სადაც თითოეულ პარტიას, გაერთიანებას აქვს იმის ფუფუნება, რომ საკუთარი ძალების დემონსტრირება უნდა სცადოს და შემდეგ ხმები ითვალოს. ახლა დროა, დათმობების", — განუცხადა ჩიქოვანმა რუსთავი 2-ს.

მისი თქმით, ახლა უკვე პარლამენტის დამოუკიდებელი დეპუტატის რანგში "ყოველგვარი პარტიული შიდა წესების", დისციპლინის, დარღვევა-არდარღვევის გათვალისწინების გარეშე საზოგადოების ინტერესების დასაცავად იმოქმედებს.