ახალ სატელევიზიო სეზონს ამერიკულ-ბრიტანული სერიალების მოყვარეულები დიდი ინტერესით უნდა დაველოდოთ.

ჩვენი არხების უმეტესობა, რომლებიც შესანიშნავად ახერხებდნენ ლათინურიდან თურქულზე, თურქულიდან კი ინდურ საგებზე მაყურებლის გადართვას, ახალი სეზონიდან ჩვენს გაბედნიერებას ამერიკული და ბრიტანული სერიალებით შეეცდებიან.

მიუხედავად იმისა, რომ ქართული არხები ბოლომდე არ გვიმეტებდნენ და წვეთ-წვეთად მაინც გვთავაზობდნენ ამერიკულ სერიალებს, მათი რაოდენობა საერთო ჯამშიც კი ვერ აღემატება იმ ინდური სერიალების რაოდენობას, რომლებიც ახლა გადის ქართულ არხებზე.

ვიცი, ერთი სული გაქვთ გაიგოთ რომელ ამერიკულ სერიალებს ნახავთ ჩვენთან და რომელ არხზე, ასე, რომ მოემზადეთ.

GDS

ტელეკომპანია GDS მაყურებელს საინტერესო და ხარისხიანი ამერიკული სერიალებით ყოველთვის ანებივრებდა. გამონაკლისი არც ეს წელი იქნება.

25 აგვისტოდან GDS-ის ეთერში ამერიკული საშინელებათა ისტორიის მეხუთე სეზონი დაიწყება. მართალია აქ ჯესიკა ლენგს ვეღარ ვნახავთ, მაგრამ შოუს შემქმნელებმა მისი ჩანაცვლება ლეიდი გაგათი, როგორ ამბობენ, წარმატებულად მოახერხეს. სიმართლე გითხრათ, მე ამ აზრს არ ვიზიარებ, მაგრამ ვისაც ჯერ არ გინახავთ სერიალის მეხუთე სეზონი, რომლის სიუჟტიც სასტუმროში ვითარდება, აგვისტოს მიწურულს თავად შეაფასებთ ჩაანაცვლა თუ არა ლანგი გაგამ.

ოქტომბრიდან მაყურებელი გრეის ანატომიის მე-12 სეზონს იხილავს და ქართულ ენაზე გაიგებს როგორ გაგრძელდა მერიდით გრეის ცხოვრება [სპოილერის] შემდეგ.

ფოტო: ABC

რაც შეეხება სხვა სერიალებს, რომლებიც GDS-ზე იქნება, ამას ქვემოთ მოგახსენებთ.

ჩიკაგოს მეხანძრეები (Chikago Fire)

ფოტო: NBC


NBC-ის სატელევიზიო სერიალი, რომელიც ერთ-ერთი ყველაზე რთული და საშიში სამუშაოს - მეხანძრის პროფესიაზე გვიყვება. ამჯერად სერიალის 4 სეზონია გადაღებული, მეხუთეს პრემიერა კი 2016 წლის ოქტომბერში იგეგმება.

ტუჩსაცხის ჯუნგლები (Lipstik Jungle)

ფოტო: NBC

თუ გიყვართ სერიალები სექსი დიდ ქალაქში და სასოწარკვეთილი დიასახლისები, დამიჯერეთ, ეს სერიალიც აუცილებლად შეგაყვარებთ თავს. სამი წარმატებული დაქალის არც თუ ისე მარტივი ცხოვრება და ორ სეზონში ჩატეული "ნიუ იორკის ყველაზე გავლენიანი ქალების" ისტორია, სადაც მთავარ როლებს - ბრიუკ შილდსი, კიმ რავერი და ლინდსეი პრაისი თამაშობენ.

მისტერ რობოტი (MR. Robot)

ბოლო დროის ერთ-ერთი ყველაზე რეიტინგული და პოპულარული ამერიკული სერიალი, რომელიც ახალგაზრდა პროგრამისტის ელიოტის ისტორიას გვიყვება. მისთვის ერთადერთი მისაღები პროფესია ჰაკერობა აღმოჩნდება და საიდუმლო ორგანიზაციის გავლენის ქვეშ მოექცევა, რომელსაც ამერიკის ყველაზე მსხვილი კორპორაციების განადგურება სურს.

ლურჯის ელფერი (Shades of blue)

ფოტო: NBC

სერიალის პრემიერა ტელეკომპანია NBC-ზე 2016 წელს შედგა. ჯენიფერ ლოპესი მთელი მისი ავლა დიდებით FBI-ის აგენტად გვევლინება და ბოროტმოქმედებს დასდევს.


ერთხელ ზღაპარში (Once Upon a Time)

ფოტო: ABC

თუ გიყვართ ზღაპრები, მაშინ მოემზადეთ, ამერიკული ტელევიზიის ვარსკვლავები ორ სამყაროში ერთდროულად გამოგზაურებენ და ყველა იმ ზღაპრის გმირს გაგაცნობენ, რომელთა ისტორიაც ბავშვობაში აღგაფრთოვანებდათ, დღეს კი როცა უკვე გაიზარდეთ გაიგებთ რომ კეთილი ფერიები თურმე ხანდახან სულაც არ არიან კეთილები.

პირადი პრაქტიკა (Private Practice)

ფოტო: ABC

მათ ვისაც სამედიცინო დრამები, განსაკუთრებით კი "გრეის ანატომია" უყვარს, და ძალიან ენატრებოდა დერეკ შეპარდის პირველი ცოლი - ედისონ მონტგომერი, ახლა შეუძლიათ პირდაპირ მისი ისტორიის მაყურებლები გახდნენ. პირადი პრაქტიკა გრეის ანატომიის სპინოფია და ამიტომ ხშირად შეხვდებით თქვენთვის საყვარელ პერსონაჟებს გრეიდან. სერიალი ABC-იზე 2007 წლიდან 2013 წლის ჩათვლით გრძელდებოდა და მისი შემქმნელი, რა თქმა უნდა, შონდა რაიმსია.

სკანდალი (Scandal)

სკანდალი

სკანდალი

ფოტო: ABC

შონდალენდის კიდევ ერთი სერიალი ქართულ ენაზე. ამჯერად კერი ვაშინგტონის არაჩვეულებრივი პერსონაჟი, საზოგადოებასთან ურთიერთობის სპეციალისტი - ოლივია პოუპი ამეტყველდება ქართულად და ისეთ ამბებს მოგითხრობთ, რომლებიც თავბრუსაც დაგახვევთ და სკანდალზე დამოკიდებულსაც გაგხდით.

რუსთავი 2

ტელეკომპანია რუსთავი 2 ერთ-ერთი პირველი იყო, რომელმაც მაყურებელს ამერიკული სერიალები შესთავაზა, სხვა თუ არაფერი პირველად აქ გავიცანით მაშველებიც, ექიმი ჰაუსიც და ბევრი სხვა ჩვენთვის საყავრელი პერსონაჟი. ახალი სატელევიზიო სეზონიდან მაყურებელს საშუალება ექნება რუსთავი 2 ერთერში ნახოს ისეთი სერიალები, როგორიც არის:

სამშობლო (HOMELAND)

ყველა დროის ერთ-ერთი საუკეთესო და ხარისხიანი სერიალი, რომელსაც ხშირ შემთხვევაში "წინასწარმეტყველურ" შოუსაც უწოდებენ, რადგან აქ განვითარებული მოვლენები ხშირად წინ უსწრებს მსოფლიო პოლიტიკურ და საზოგადოებრივ ცხოვრებაში მომხდარ მოვლენებს.

სერიალი, გარდა იმისა, რომ არაჩვეულებრივია თავისი სიუჟეტით, არაჩვეულებრივია სამსახიობო შემადგენლობითაც, აქ თქვენ გაიცნობთ ქლერ დეინსის, მენდი პატინკინისა და დემიან ლუისის არაჩვეულებრივ ტრიოს.

უცხოელი (Outlander)

ფოტო: Starz

ბრიტანულ-ამერიკული კოსტიუმირებული სერიალი, სადაც დროში მოგზაურობა გვიწევს და მეორე მსოფლიო ომიდან პირდაპირ 1743 წლის ბრიტანეთში აღმოვჩნდებით.

პირველი არხი:

პირველი არხის ამერიკული სერიალების სია ასე გამოიყურება:

ცბიერი მოახლეები (Devious Maids)

22 აგვისტოდან საზოგადოებრივ მაუწყებელზე ცბიერი მოახლეები იწყება, სერიალი, რომელსაც სასოწარკვეთილი დიასახლისების შვილობილს უწოდებენ. გასაკვირი არც არის მისი შემქმნელი მარკ ჩერია, ადამიანი რომელმაც მსოფლიოს სასოწარკვეთილი დიასახლისები აჩუქა.

ჩერის კომედიური დრამა ეთერში 2013 წლიდან გადის და მთელი მსოფლიოს მასშტაბით მილიონობით გულშემატკივარი ჰყავს. ისტორია ლათინოსი მოახლეების ცხოვრების გარშემო ვითარდება და მათი ჩახლართული ინტრიგების შესახებ მოგვითხრობს. შოუს სიუჟეტი ყველა ეროვნების, სოციალური ფენის და რასის მაყურებლისათვის საინტერესოა და დარწმუნებული ვარ გამონაკლისი არც ქართველ მაყურებელი აღმოჩნდება. ასე რომ მოემზადეთ და 22 აგვისტოდან ლათინოსი მოახლეების საიდუმლოებებით, თავგადასავლებით, რომანებით და ყოველდღიური პრობლემებით აღსავსე ცხოვრებაში გადაეშვით.

ამერიკელები (The Americans)

ფოტო: FX

სერიალის ისტორია 1980-იან წლებში, ცივი ომის პერიოდის ამერიკაში ვითარდება და მოგვითხრობს ცოლ-ქმრის ამბავს, რომლებიც КГБ-ს აგენტები არიან. ისინი ე.წ. არალეგალები არიან, წლების წინ ჩანერგილი აგენტები, რომლებიც ისე ცხოვრობენ, როგორც ჩვეულებრივი ამერიკელები, ლაპარაკობენ სუფთა ინგლისურით, მუშაობენ, გადასახადებს იხდნიან, FBI-ს გაურბიან და ინფორმაციას საბჭოთა კავშირის სასარგებლოდ იპარავენ.

შურისძიება (Revange)

ფოტო: ABC

სერიალის მთავარი ხაზი ამანდა კლარკის პერსონაჟის გარშემო ვითარდება, რომელიც ახალი ვინაობით ბრუნდება ქალაქში და ყველაზე სასტიკი შურისძიებისთვის ემზადება.

წარმატება (Smash)

ფოტო: NBC

მუსიკალური დრამა, რომელიც თეატრის კულისებში შეგვახედებს და მსახიობების, მოცეკვავეებისა და მუსიკოსების ცხოვრებას სხვადასხვა კუთხიდან დაგვანახებს.

კოსტიუმები (Suits)

ფოტო: USA Network

USA NETWORK-ის ერთ-ერთი ყველაზე გახმაურებული სერიალი, რომელიც ერთ-ერთი ნიუ-იორკულ იურიდიული ფირმის შიდა სამზარეულოში შეგვახედებს.

იმედი

ტელეკომპანია იმედის ყურადღების ცენტრში ერთ-ერთი ყველაზე გახმაურებლი და საინტერესო სერიალი მოექცა.

ვიკინგები (VIkings)

სერიალი რაგნარის ვიკინგების რაზმზე მოგვითხრობს, რომელიც ნორვეგიული ლეგენდის მიხედვით, ომისა და მეომრების ღმერთის - ოდინის შთამომავალია.

თეთრი დედოფალი (THE WHITE QUEEN)

ფოტო: BBC One

BBC One-ის ისტორიული დრამა სამი ამბიციური ქალის შესახებ, რომლებიც ამტკიცებენ რომ მათთვის მიზანი ამართლებს საშუალებას.

ჯერჯერობით ასე გამოიყურება იმ ამერიკულ-ბრიტანული სერიალების სია, რომელსაც აგვისტოდან მოყოლებული 2016-2017 წლის ქართულ სატელევიზიო სეზონზე ვნახავთ. თუმცა დაგაიმედებთ და გეტყვით, რომ მალე ეს ჩამონათვალი აუცილებლად გაიზრდება.