ყირგიზელი მომღერალი Zere მუსიკალურ ვიდეოში ბიუსტჰალტერითა და პიჯაკით გამოსვლის გამო, მუქარის შემცველ მესიჯებს იღებს. 19 წლის შემსრულებელს სიკვდილით დასჯითაც ემუქრებიან.

როგორც BBC წერს, მან სიმღერა იმ განწყობების გასაპროტესტებლად დაწერა, რომლებიც მის სამშობლოში ქალების მიმართ აქვთ. Zere ამბობს, რომ სიმღერა გენდერულ დისკრიმინაციას უპირისპირდება.

"ჩემი სიმღერა მხოლოდ ქალებზე არაა. ის ყველა იმ ადამიანზეა, ვინც იქცევა ისე, როგორც სურს, არის ის, ვინც უნდა რომ იყოს და აცვია ის, რაც უნდა რომ ეცვას. მათ არავინ განიკითხავს და არც ისინი განიკითხავენ სხვებს", - ამბობს ის BBC-სთან მიცემულ ინტერვიუში.

1991 წელს, საბჭოთა კავშირის დაშლის შემდეგ, ყირგიზეთმა დამოუკიდებლობა მიიღო. აზიურ ქვეყანაში 6 მილიონი ადამიანი ცხოვრობს და მათი უმრავლესობა თურქულად მოსაუბრე მუსლიმია.