ფინანსთა სამინისტროს საგამოძიებო სამსახურის განცხადებით, პირმა ყალბი დოკუმენტების გამოყენებით საკუთრებაში დაირეგისტრირა ნინოწმინდის ტერიტორიაზე მდებარე ერთ-ერთ ტბაში არსებული 1 807 მ2 ფართობის კუნძული. ყალბი ოფიციალური დოკუმენტების დამზადებისა და სახელმწიფოს ქონების მოტყუებით დაუფლების ბრალდებით, აღნიშული პირი პასუხისგებაში მისცეს.

გამოძიების ვერსიით, ბრალდებულმა დაამზადებინა ყალბი საკადასტრო აზომვითი ნახაზი და ყალბი ცნობა, თითქოსდა მას საკუთრებაში გადაეცა სასოფლო-სამეურნეო დანიშნულების მიწის ნაკვეთი.

საქმეზე გამოძიება საქართველოს სისხლის სამართლის კოდექსის 180-ე და 362-ე მუხლების მეორე ნაწილებით მიმდინარეობს, რაც სასჯელის სახით ითვალისწინებს თავისუფლების აღკვეთას 4-დან 7 წლამდე ვადით.