ქართული ოცნების წევრის, ნუკრი ქანთარიას თქმით, ყოფილი პრემიერ-მინისტრისთვის, ბიძინა ივანიშვილისთვის ოთხი მილიონი ლარი იგივეა, რაც ოთხი ლარი. ასე გამოეხმაურა დეპუტატი ომეგა ჯგუფის დამფუძნებლის, ზაზა ოქუაშვილის ბრალდებას ბიძინა ივანიშვილის მიერ მისთვის ამ თანხის მოთხოვნასთან დაკავშირებით.

"კაცი, თურმე, პატიოსნად იხდის გადასახადებს, თურმე ბიძინას [ივანიშვილს] ოთხი მილიონი ჰაერივით სჭირდებოდა. ერთი რამ მითხარით, თქვენ ოთხი ლარისთვის გაისვრით ხელს?.. ოთხი მილიონი მილიარდერებისთვის, ფაქტობრივად, იგივეა".

ნუკრი ქანთარია ზაზა ოქუაშვილის ინტერვიუს, რომელიც მან რუსთავი 2-ს მისცა, სერიალს უწოდებს. ამის შესახებ მან ქართული ოცნების შეხვედრის დაწყებამდე განაცხადა.

"სერიალში, რომელსაც რუსთავი 2 წარმოგვიდგენს, გამოჩნდა სამართლიანობისთვის მებრძოლი, ტანჯული, ხალხზე მზრუნველი, ოთხმილიონწართმეული გმირი და გარკვეულწილად შეიკრა წრე სულთამხუთავ, ბოროტმოქმედთა, მებრძოლთა წრე — მიხეილ სააკაშვილი, ზაზა ოქუაშვილი, ნაციონალური მოძრაობა და რუსთავი 2", — განაცხადა ქანთარიამ.

მისივე თქმით, "სერიალს მეორე სეზონიც" ექნება, რომლის განვითარებასაც უახლოეს დღეებში ვიხილავთ:

"ახლა ამ სერიალს რომ სჭირდებოდა ასეთი გმირი, ამას არ სჭირდება მკითხაობა. დანარჩენი, მეორე სეზონში ვინ როგორ იქნება, ლევან ყიფიანი მონასტერში იქნება მამა ლეონიდეს სახელით, თუ ფარცხალაძე მისი ძმა აღმოჩნდება, ამას ჩვენ უკვე ვნახავთ უახლოეს დღეებში".

30 სექტემბრის ინტერვიუში ზაზა ოქუაშვილმა განაცხადა, რომ ბიძინა ივანიშვილმა მას პატრიოტთა ალიანსის დაფინანსებაც მოსთხოვა. მისივე თქმით, ივანიშვილმა, ასევე, მოთხოვა, რომ თავისი მოგებიდან 50%-ით ქართული ოცნება დაეფინანსებინა. თუმცა, როგორც ის ამბობს, მას პატრიოტთა ალიანსი და ქართული ოცნება აღარ დაუფინანსებია.

ბიზნესმენმა ასევე თქვა, რომ სპორტის ყოფილ მინისტრს, ლევან ყიფიანს ყოფილი პროკურორი, ოთარ ფარცხალაძე ფიზიკურად გაუსწორდა და გაუპატიურებით დაემუქრა.

ზაზა ოქუაშვილი აჭარის უმაღლეს საბჭოში, მისი ცოლი, ნატო ჩხეიძე კი საქართველოს პარლამენტში პატრიოტთა ალიანსის სიით მოხვდნენ. ჩხეიძემ ფრაქციის დატოვების შესახებ რამდენიმე დღის წინ ისაუბრა.