თუ უეცრად აღმოაჩინეთ, რომ ფეისბუქის ანგარიშიდან გამოსული ხართ, თქვენ მარტო არ ხართ და არა, ამჯერად არავინ ცდილობდა თქვენს ინბოქსში შეღწევას.

როგორც ჩანს იგივე პრობლემა უამრავ სხვა ადამიანსაც შეექმნა. 28 სექტემბრის დილიდან ფეისბუქი სხვადასხვა ქვეყანაში მცირე დროით გაითიშა.

ფეისბუქის უცნაური ქცევა მომხმარებლებმა პირველად ინდოეთში დილის 10 საათიდან დააფიქსირეს, სადაც ფეისბუქის გარდა მცირე დროით მესენჯერიც გაითიშა.

მსგავსი პრობლემები დაფიქსირდა ავსტრალიაში, იაპონიაში, ფილიპინებში, ამერიკის გარკვეულ რეგიონებში, აფრიკასა და ევროპის გარკვეულ ნაწილში. ანგარიშიდან გაფრთხილების გარეშე გამოსვლა კი სწორედ ამის შედეგია.

კომპანიას ამის შესახებ განცხადება ჯერ არ გაუკეთებია, თუმცა მათ განაცხადეს, რომ დამატებით ინფორმაციას მოგვიანებით გაავრცელებენ.