რამდენიმე კვირის წინ გუგლმა ერთ-ერთი ყველაზე პოპულარული ბრაუზერის, Google Chrome-ის განახლებული ვერსია გამოუშვა. ახალ ქრომს განახლებული ფუნქციები და გაუმჯობესებული დიზაინი აქვს, თუმცა ბრაუზერის ახალ ვერსიაში დამატებულმა ერთ-ერთმა ფუნქციამ მომხმარებლების უკმაყოფილება გამოიწვია.

ალბათ შეამჩნევდით, რომ საკუთარი იმეილის გამოყენებით ქრომში ავტორიზაციის გავლა შეგიძლიათ, რის შედეგადაც ბრაუზერი თქვენს პარამეტრებს, შენახულ საიტებს, ისტორიას და სხვა ინფორმაციას ინახავს. ეს კი საშუალებას გაძლევთ, რომ ახალ კომპიუტერზე მოხვედრისას თქვენი ბრაუზერის პარამეტრები არ დაკარგოთ. ქრომის ყველა ვერსიაში ეს ფუნქცია ნებაყოფლობითი იყო, ანუ თქვენ ირჩევდით, გსურდათ თუ არა ბრაუზერში ავტორიზაციის გავლა და გუგლისთვის საკუთარი ინფორმაციის გაზიარება.

ქრომის ახალი ვერსია ბრაუზერში ავტომატურ ავტორიზაციას მაშინ აკეთებს, როდესაც თქვენ გუგლის რომელიმე სერვისში, მაგალითად Gmail-ში იმეილის გამოყენებით შეხვალთ.

მომხმარებლების უკმაყოფილება ძირითადად იმ ფაქტმა გამოიწვია, რომ ეს სიახლე განახლებაში ნახსენები არ იყო. ამ ფუნქციას აქვს პოტენციალი, რომ გუგლს მომხმარებლებზე დამატებითი ინფორმაციის შეგროვების საშუალება მისცეს.

გუგლში განმარტეს, რომ აღნიშნული ფუნქცია მოსახერხებელია ისეთ კომპიუტერებზე, რომლებსაც რამდენიმე ადამიანი იყენებს და მისი მიზანი გაურკვევლობის თავიდან არიდებაა - თუ თქვენ Gmail ის ანგარიშიდან გამოხვალთ, თქვენ ავტომატურად გამოდიხართ Google Chrome-იდანაც, რაც საკმაოდ მოსახერხებელია.

მათ ასევე განაცხადეს, რომ ავტორიზაციის შემდეგ გუგლი თქვენს ინფორმაციას ავტომატურად არ ინახავს და ეს ფუნქცია პარამეტრებიდან ხელით უნდა ჩართოთ.

მომხმარებლების უკმაყოფილება გასაკვირი არ არის. ჩვენ ცოტა ხნის წინ გავიგეთ, რომ ანდროიდის სმარტფონები ადგილმდებარეობის ინფორმაციას გუგლს მაშინაც უგზავნის, როდესაც ეს ფუნქცია თითქოს გამორთულია, გუგლი ასევე ინახავს ყველა ხმოვან ბრძანებას, რომელიც საკუთარი ანდროიდ სმარტფონისთვის გითქვამთ.

ამ ეტაპზე ქრომში ავტომატური ავტორიზაციის გამორთვა შემდეგნაირად არის შესაძლებელი:

  1. მისამართის ველში ჩაწერეთ "chrome://flags/#account-consistency" და დააჭირეთ Enter-ს.
  2. პარამეტრ "Identity consistency between browser and cookie jar-ზე" მიუთითეთ Disabled.
  3. გადატვირთეთ ბრაუზერი.